Pep GuardiolaPep Guardiola ka vendosur që pas largimit nga Mançester Siti, të shkëputet nga futbolli i luajtur dhe eksperienca në pankinë. Trajneri katalanas e ka konfirmuar këtë në një intervistë për “GQ” në Spanjë, ku ka zbuluar se do të veprojë në të njëjtën mënyrë si kishte bërë pasi u largua nga Barcelona.
Ai gjithashtu nuk i ka pranuar kritikat e tepërta në adresë të tij, duke kujtuar serinë e jashtëzakonshme të trofeve që ka fituar në vitet si trajner. Por duke bërë të qartë se për sa kohë që të jetë në pankinë, do të kërkojë të fitojë të tjerë.
“Pas kësaj etape me Mançester Sitin, do të ndalem. Është vendosur tashmë, më shumë se e vendosur. Nuk e di sa do të zgjasë, nëse do të jetë një vit, dy, tre, pesë, dhjetë apo pesëmbëdhjetë. Nuk e di. E di që do të ndodhë pas kësaj periudhe me Sitin sepse duhet të ndalem dhe të përqendrohem te vetja, te trupi im. Duhet ta bëj.
Ky, sezoni më i keq? Kur fiton gjashtë tituj të Premier Ligës, vjen një moment i keq. Është natyra njerëzore. Ndoshta duhet të kishim ndryshuar më shumë lojtarë, por është e lehtë ta thuash këtë duke parë prapa. Në fund, arritëm në finalen e Kupës FA dhe përfunduam të tretët, jo të dymbëdhjetit siç do të kishim bërë nëse do të kishim hequr dorë: nuk ishte aq keq. Dhe tashmë duke parë prapa, e kuptojmë se nuk ishte e gjitha një katastrofë. Por pati muaj kur nuk fituam. Dhe mendoj se ajo që na ndodhi është diçka që na bën mirë. të gjitha lëndimet që patëm na bënë të kuptojmë se çfarë shkoi keq. Mendoj se do të jetë pozitive për vitet e ardhshme.
Prisja kritika; të jep energji. Janë të njëjtët njerëz që thoshin se kisha fituar në Barcelonë vetëm sepse e njihja ekipin dhe që më thanë kur mbërrita në Mançester se futbolli anglez ishte ndryshe. Në sport, nuk mund të fitosh gjithmonë dhe humbja është pjesë e procesit. Majkëll Xhordan ishte më i madhi, por ai fitoi gjashtë tituj në 15 vjet. Tajgër Uds ishte më i madhi, por ai gjithashtu humbi më shumë trofe mes atyre që ka luajtur. Unë luajta 16 kampionate dhe fitova 13: Humba disa, por nuk ishte keq.
Dhe jam i lumtur që shkoi kështu, veçanërisht në këtë shoqëri të përsosur ku gjithmonë duhet të tregojmë se jemi të lumtur. Gjëja e rëndësishme është të japësh gjithçka dhe të bësh më të mirën tënde: Unë di që nuk jam dorëzuar, se kemi arritur rezultate më të këqija nga sa prisnim, por do të vazhdoj të përpiqem, i bindur se vitin tjetër gjërat do të jenë më mirë. Sigurisht, nuk ka profesion tjetër në botë ku 60000 njerëz këndojnë se do ta humbasësh punën të nesërmen në mëngjes, siç më ndodhi mua për 4-5 muaj. Presioni që kemi mbi shpatulla është i jashtëzakonshëm”, tha ndër të tjera Guardiola
