Një pasagjer është nxjerrë i gjallë nga rrënojat e aeroplanit të Air India që u rrëzua sot pasi u ngrit nga qyteti perëndimor i Ahmedabadit. Një britanik i ka mbijetuar rrëzimit të aeroplanit të Air India, sipas mediave indiane.
Duke folur për gazetën Hindustan Times, Vishwash Kumar Ramesh tha se dëgjoi një “zhurmë të lartë” rreth 30 sekonda pas ngritjes, përpara se aeroplani të rrëzohej, shkruan Sky News.
“Gjithçka ndodhi kaq shpejt”, tha ai, duke shtuar se kishte marrë “lëndime nga goditja” në gjoks, sy dhe këmbë.
“Kur u ngrita, kishte trupa përreth meje. Isha i frikësuar. U ngrita dhe vrapova. Kishte copa të aeroplanit përreth meje.”
“Dikush më kapi, më futi në një ambulancë dhe më çoi në spital.”
Nga pamjet e shpërndara në mediat sociale tregohet një burrë që duket të jetë Vishwash duke u larguar çalueshëm nga vendi i rrëzimit dhe duke u çuar drejt shërbimeve të emergjencës.
Fluturimi AI171 i Air India u nis nga Ahmedabad për në Londër Gatwick në orën 13:38 sipas orës lokale të mërkurën, duke transportuar 242 pasagjerë dhe anëtarë të ekuipazhit.
Midis tyre ishin 169 indianë, 53 britanikë, shtatë portugezë dhe një kanadez.
