Pas suksesit mahnitës të atyre fotove ku Edi Rama shfaqej si bebe, Kryeministri ynë mendoi: “Po sikur t’i bëj edhe ministrat fëmijë… ose më mirë, të mos jenë fare njerëz?” Dhe ja ku jemi: qeveria e re shqiptare, me ministra të pajetë, të krijuar nga… kompjuterët.
Në krye të Ministrisë së Brendshme vjen Qylafi Digjital, që çdo herë që ka protesta në rrugë, nxjerr mesazhin: “Sistemi është i zënë, provoni më vonë.” Ministrinë e Ekonomisë e merr Llogaristi Automatik, që kur pyetet për buxhetin, përgjigjet vetëm: “Zero lekë, por gjithçka është nën kontroll!” Ministrinë e Kulturës e drejton Thesari Memesh, që mendon se çdo problem zgjidhet me një video qesharake në internet.
Por, lind pyetja që ngacmon popullin: Kur të ndodhë ndonjë aferë, kush do shkojë në burg për Edin? Sepse kur ministrat janë kabllo e tela, nuk mund të shoqërosh prangat nëpër sirtarë.
Përgjigja satirike është e thjeshtë: Askush! Përkundrazi, kur të vijë SPAK-u, Edi do tregojë me gisht prizën: “Unë ua thashë që këta ishin vetëm ca spinela dhe çipa! Nëse keni gjë, arrestoni karikuesin!” Dhe populli, si gjithmonë, do e shohë spektaklin me kafe në dorë, duke thënë: “Hë, shëndet me jetë, prapë pa faj do dalë!”
