Gjykata e Fierit ka shpallur moskompetencën për dosjen hetimore mbi shpërthimin e ndodhur disa ditë më parë në magazinën e deputetit të PS, Bujar Çela në Lushnjë, ku humbën jetën dy persona.
Për këtë ngjarje sot u la në burg biznesmeni Leonard Gjini i cili kishte firmosur kontratë me ligjvënësin për ndërtimin e kapanonit.
Për pasojë, dosja hetimore i kalon SPAK si prokuroria kompetente për shkak të subjektit, për të vijuar hetimet ndaj deputetit, Bujar Çela.
Pas administrimit të të dhënave, Prokuroria pranë Gjykatës së Shkallës së Parë Juridiksionit të Përgjithshëm Fier ka regjistruar emrat e 7 (shtatë) personave që u atribuohet vepra penale, mes tyre edhe deputeti Çela.
Ndaj deputetit socialist rëndojnë akuzat e vepres penale “Shkelja e rregullave të mbrojtjes në punë”, “Ndërtimi i paligjshëm”, dhe “Shkatërimi i pronës nga pakujdesia”.
