Kreu i agjencisë së brendshme të inteligjencës izraelite, Shin Bet mori përgjegjësinë për dështimin për të parandaluar Hamasin nga kryerja e sulmit të tij vdekjeprurës.
“Pavarësisht nga një sërë veprimesh që kryem, për fat të keq, të shtunën nuk ishim në gjendje të gjeneronim paralajmërim të mjaftueshëm që do të lejonte të pengohej sulmi. Si ai që drejton organizatën, përgjegjësia për këtë është mbi mua. Do të ketë kohë për hetime. Tani ne luftojmë”, u shpreh në një deklaratë drejtori i Shin Bet, Ronen Bar, raporton Reuters.
Luftimet midis Gazës dhe Izraelit që nisën më shumë se një javë më parë kanë shkaktuar mijëra të vdekur dhe të plagosur dhe qindra mijëra janë zhvendosur si pasojë e sulmeve të vazhdueshme nga të dyja palët.
