Ish-sekretari amerikan i Shtetit, Henry Kissinger, thotë se vendet e Europës kanë gabuar që kanë pranuar shumë njerëz, që tani po mbështesin veprimet e Hamasit kundër Izraelit.
I pyetur gjatë një interviste për Welt TV, për “arabët që festojnë” në rrugët e Berlinit pas inkursionit të Hamasit në Izrael, Kissinger, një hebre i mbijetuar i Holokaustit, tha se gjeste të tilla të mbështetjes për aktet kriminale i dukeshin “të dhimbshme”.
“Ishte një gabim i rëndë të pranosh në vend kaq shumë njerëz me koncepte krejtësisht të ndryshme kulturore dhe fetare, sepse krijon një grup presioni brenda çdo vendi që e bën këtë,” vuri në dukje ai.
I pyetur se çfarë duhet të bëjnë Gjermania dhe BE-ja në situatën aktuale, Kissinger tha se ai pret mbështetje politike “të pakushtëzuar” për Izraelin – si dhe mbështetje ushtarake nëse është e nevojshme.
“Duhet të ketë ndonjë ndëshkim; duhet të ketë disa kufizime serioze në aftësinë e tyre për të ndërmarrë këtë lloj veprimi,” tha ai për taktikat e Hamasit.
“Unë do të thosha se çdo komb evropian ka të njëjtin interes, sepse e njëjta qasje mund t’i drejtohet Evropës,” paralajmëroi ai.
Ish-diplomati numër një i Uashingtonit kujtoi bisedimet e paqes që i dhanë fund Luftës së Yom Kipurit pesë dekada më parë, duke thënë se vendet perëndimore dhe Izraeli ishin me fat që kishin një udhëheqës arab “me një vizion për të ardhmen” në Anwar Sadat, ish-presidenti i Egjiptit.
“Unë nuk mendoj se është e mundur të gjesh liderë mes grupit të Hamasit [me vizion të ngjashëm],” tha ai, “Unë mendoj se Hamasi duhet të përjashtohet nga një rol politik.”
