Problematikat e pallateve me dëmtime të rënda nga tërmeti (DS4 dhe DS5) në Durrës janë ende të hapura.
Zvarritja e procesit të riforcimit të tyre shtyn afatet e rikthimit në shtëpi të familjeve të mbetura të pastreha, ndërkohë që mos marrja e bonusit të qirasë prej 4 muajsh tashmë e bën situatën edhe më të rëndë.
Në mbledhjen e KB-së, kkreu i PD Durrës dhe ëshilltari i PD Jonuz Myshketa ngriti shqetësimin e banorëve të një blloku pallatesh në lagjen nr.18, në rrugën “Horizonti”.
Sipas Myshketës, një pjesë e banorëve të kompleksit të pallateve, ku banonin 120 familje, janë rikthyer të banojnë në apartamentet ku punimet nuk janë mbyllur ende duke marrë kështu përsipër risqet e jetesës “në një banesë të papërfunduar dhe të pacertifikuar ende për kushtet e sigurisë së saj”.
Në përgjigjen e saj, kryebashkiakja Emiriana Sako nënvizoi se shpesh dinamikat e procesit të rindërtimit mbartin vonesa të shkaktuara edhe prej palëve të treta.
Ajo siguroi se nga java e ardhshme do të nisë puna për përfundimin e punimeve në katin përdhe për të përmbyllur riforcimin e këtyre godinave të dëmtuara nga tërmeti i 26 nëntorit 2019.
