Prej disa ditësh në mediat online kanë shpërthyer artikujt në lidhje me përplasjen mes portalit Newsbomb.al dhe Anila Bashës me drejtuesin e AcroMax në Shqipëri, Aldor Nini.
Kulmimi i përplasjes filloi kur u mbyllën llogaritë në Facebook, TikTok dhe Instagram e llogarive e portalit Newsbomb. Gazetarja Anila Basha akuzonte se pas kësaj qëndronte Aldor Nini dhe Acromax, që po godiste median e lirë.
Në një artikull të datës 22 qershor, Newsbomb thotë se kishte nisur një investigim ndaj AcroMax, të regjistruar në Gjermani, për të zbuluar se kush qëndronte pas kompanisë. Zyrtarisht pretendohet në artikull se është dorëzuar një kërkesë e detajuar në ambasadën gjermane në Tiranë për informacione më të detajuara për operimin në Shqipëri të një kompanie të regjistruar në Gjermani, drejtuar nga një shtetas me pasaportë gjermane e kompani shqiptare.
Në të njëjtën datë, një tjetër artikull i këtij portali akuzonte AcroMax për mashtrim të artistëve shqiptarë me mbrojtjen e të drejtave të krijimtarisë së tyre në rrjete sociale si dhe për fshehje të të ardhurave ndaj tatimorëve gjermanë.
Pesë ditë më vonë, më 27 qershor Newsbomb publikon një tjetër artikull, këtë herë duke akuzuar drejtuesin e AcroMax, Aldor Nini për dhunë ndaj ish-bashkëjetueses së tij, Anxhela Faber, vajza e ish-ambasadores shqiptare në SHBA, Filloreta Faber dhe bashkëortake me të në kompaninë AcroMax. Artikulli referonte një denoncim në polici e prokurori të Anxhela Faber.
Fill pas kësaj, në Facebook dhe rrjetet e tjera sociale bëhen virale disa postime të publikuara në një faqe me emrin ‘Limoni Artë’, që nga të dhënat rezulton e hapur më 29 qershor, pra dy ditë pas artikullit të publikuar në Newsbomb ndaj Aldor Ninit.
Faqja në total ka katër postime. Në njërin prej tyre denoncohet gazetarja Anila Basha dhe mbesa e saj, S.B për gjobëvënie.
Ndërsa tre të tjerët janë materiale pa lidhje me profesionin e gazetares Anila Basha dhe mbesës së saj, por sulme personale.
Bëhet fjalë për dy video ku shfaqet S.B dhe në një tjetër Serena Sula. S.B tregohet duke festuar ditëlindjen, ku si tortë ka një organ mashkullor.
Në të dytën, mbesa e gazetares Anila Basha shfaqet e tensionuar në një video që mban përshkrimin: “Anila Basha akuzon persona të pafajshëm për dhunë – ndërkohë del që familja saj është vetë dhunuese sipas dëshmisë së mbesës.
Mbesa saj, thotë në video: “Po, më kanë dhunuar kur isha fëmijë” – ngel pyetja nga kush? Babai @ilirianbasha Halla @bashanila , i dashuri @rimlav.xh ? Kush ka dhunuar Sarën si fëmijë? Apo është kjo që shikojmë një performance teatri e mbesës për të arritur qëllime të tjera? Kjo gjë do të zbulohet shumë shpejtë në pjesën e dytë – staytuned.
Videoja është publikuar ditën e martë, në të njëjtën ditë kur sipas njoftimit të policisë është arrestuar drejtuesi i AcroMax, Aldor Nini me akuzën e përndjekjes dhe dhunimit të bashkëjetueses së tij dhe nën dyshimet se ka publikuar një video pa pëlqimin e saj, duke iu referuar videos së ditëlindjes të S.B me tortën në formën e organit mashkullor.
Sipas njoftimit të policisë, mbesa e Anila Bashës, S.B thuhet se bashkëjetonte me Aldor Ninin, drejtuesin e AcroMax. E gjithë përplasja e mësipërme tregon se motivet janë sa profesionale po aq dhe personale.
