Vetëm 45 ditë nga përfundimi i zgjedhjeve lokale, pas një fitoreje të paparë të PS të Edi Ramës dhe dështimit të projektit politik të Berishës dhe Metës, kanë filluar të dalin në sipërfaqe pakënaqësi të fshehura.
Kjo ishte java më e shqetësuar brenda Rilindjes. Në mediat pranë pushtetit dhe nga njerëz të pushtetit, jo vetëm si thashethem, po përflitet një ndryshim i madh.
Në emisionin “Real Story” të Sokol Ballës, nuk u fol as për Kosovën, as për propozimet e Kryeministrit për zgjidhjen e krizës, apo takimet e tij në Bruksel, por për ndryshime Kushtetuese, për rritje të kompetencave të Presidentit, si një projekt i maxhorancës, për të përgatitur një ndryshim, që ende nuk dihet. Nuk u përjashtua mundësia e zgjedhjeve të parakohshme, që do të rrisnin mundësitë e zgjerimit të maxhorancës rilindase në Parlament. Këto lëvizje, në çdo rast, do të sillnin shkurtimin e mandatit të tretë të Edi Ramës, ose dobësimin e Pushtetit të Kryeministrit në favor të Presidentit.
Ende pa u dekoduar kjo bisedë që u bë në Report TV të enjten, Fatmir Xhafa doli të premten në një intervistë tek A2 për gazetaren Merita Haklaj dhe foli për një shqetësim të Kryeministrit. Edhe këtë herë, ndryshe nga dëshira e Ramës për tu dukur i shqetësuar për Kosovën, Xhafaj kishte pikasur një shqetësim për të ardhmen politike të liderit. Shikonte nevojën për ndryshime të rëndësishme brenda maxhorancës, shprehte domosdoshmerinë e ndryshimeve në qeveri.
“Jo make up por rinovim total”, ishte fjalia e Xhafës, që dukej sikur nënkupton largimin e Ramës nga Kryeministër. Sepse ndryshimet në qeveri janë bërë gjithmonë si “make up”, përsa kohë që Kryeministri është i gjithëpushtetshëm.
Vetë Kryeministri nuk e ka ndihmuar publikun të kuptojë burimin apo qëllimin e këtyre deklaratave. As ka mohuar projektin për ndryshimin e Kushtetutës. Në një dalje për ‘Euronews’, ai foli madje për Procesin e Berlinit, për Kosovën dhe për drynin që i vuri Ballkanit të Hapur, pa përmendur fare kunjat që po i hedhin nga brenda.
Pas intervistës së tij jo vetëm që nuk morën përgjigje pyetjet:
1. Kush po e hedh idenë e dobësimit të pushtetit të Edi Ramës?
2. Kush po i përgatit ndryshimet Kushtetuese për forcimin e kompetencave të Presidentit dhe pse?
3. A është Fatmir Xhafa në një inkursion personal kur kërkon ndryshime thelbësore apo përfaqëson një grup brenda PS?
Por pas intervistës së Ramës, lindin pyetje të tjera:
1. Pse Edi Rama po e vret Ballkanin e Hapur, në favor të Procesit të Berlinit, kur prej 8 vjetësh por tentonte të vriste Procesin e Berlinit nëpërmjet Ballkanit të Hapur?
2. Pse do të bëhet në Tiranë samiti i Tetorit?
3. Pse do të bëjë Kryeministri i Shqipërisë tur në gjithë Ballkanin Perëndimor për Procesin e Berlinit, që vetë emri sugjeron se është i Gjermanisë?
4. Pse Rama po sillet si negociator i pakërkuar në çdo dalje televizive, ndërsa po redukton daljen e tij si Kryeministër?
Nuk ka ende asnjë shenjë që mund të çojë në konkluzionin se Edi Rama ka vendosur të transferojë pushtetin ekzekutiv në favor të një posti honorifik, si President apo mediator me kohë të plotë, por dyshimet sa po vijnë e po shtohen.
Lulzim Basha ka nisur të artikulojë ndryshime në Arkitekturën Kushtetuese për veting në politikë, kufizim i mandatit të KM, listat të hapura dhe vota e diasporës.
Po ashtu një iniciativë e Nismës Thurje, LZHK, PR dhe PAA, për ndryshime në sistemin zgjedhor, sugjeron një Referendum për ndryshimin e Kushtetutës. Ndërkohë që projekti i fshehtë për transferimin e kompetencave tek Presidenti, do të kërkonte gjithashtu ndryshime të Kushtetutës. Këto mund të bëhen në Parlament me 94 vota, që maxhoranca nuk i ka, prandaj do të kërkojnë, ose votat e opozitës, ose një referendum.
Në të gjitha variantet, e sigurtë është që vera do të jetë shumë e nxehtë, por vjeshta akoma më e nxehtë. Do të ketë ndryshime politike, ose goditje të mëdha për “puçistët” brenda Rilindjes që kërkojnë dobësimin e Edi Ramës.
