24 orët e fundit kanë vënë sërisht në dukje rolin e befasisë në konfliktet e dhunshme. Ndërsa kreu i grupit mercenar të Wagner, E. Prigozhin ka ngritur nivelin e akuzave në videot e tij të fundit ndoshta e kanë parë atë të kapërcejë vijat e kuqe për udhëheqjen e Rusisë: ai ka ‘kapërcyer Rubikonin’.
Në një deklaratë audio në 24 orët e fundit, Prigozhin deklaroi se: “Shoygu (ministri i Mbrojtjes së Rusisë) po vret fëmijë duke hedhur në luftë ushtarë të patrajnuar, përfshirë edhe rekrutët…Ne luftojmë vetëm me profesionistë. Por nëse dikush qëndron në rrugën tonë, ne do të shkatërrojmë GJITHÇKA në rrugën tonë”.
Mercenarët e grupit Wagner, të cilët po marshonin drejt Moskës, kanë rënë dakord që të kthehen mbrapsht për të shmangur gjakderdhjen, tha kreu i grupit Wagner mbrëmjen e së shtunës.
Luftëtarët e ushtrisë private Wagner ishin vetëm 200 kilometra larg kryeqytetit, tha ish-aleati i Presidentit Putin, Yevgeny Prigozhin.
“Tani ka ardhur momenti kur mund të derdhet gjak. Duke e kuptuar që do të derdhet gjaku rus, ne po e kthejmë autokolonën mbrapsht dhe po kthehemi në kampet fushore siç ishte planifikuar”, tha zoti Prigozhin duke nënkuptuar Ukrainën.
Zoti Prigozhin tha se donte të shmangte gjakderdhjen në Rusi. Ai nuk tha nëse Kremlini i është përgjigjur kërkesës së tij për të shkarkuar ministrin e Mbrojtjes Sergei Shoigu.
Deri në publikimin e këtij lajmi nuk ka patur reagime nga Kremlini.
Njoftimi për tërheqjen erdhi pas një deklarate nga zyra e Presidentit të Bjellorusisë Alexander Lukashenko, se ai kishte negociuar një marrëveshje me Prigozhinin pasi kishte diskutuar mbi këtë çështje me Presidentin Putin.
“Prigozhini ra dakord të ndërpriste përparimin drejt Moskës, sipas një marrëveshjeje të propozuar, përfshirë garancinë për siguri për trupat e Wagnerit”, tha zyra e Lukashenskos, pa dhënë më shumë detaje.
Agjencia e lajmeve Reuters citon agjencinë bjelloruse shtetërore të lajmeve se Presidenti Lukashenko zhvilloi një telefonatë të dytë me Presidentin Putin mbrëmjen e së shtunës për ta njoftuar atë lidhur me rezultatet e bisedimeve me kreun e grupit mercenar Wagner.
Autokolona e mercenarëve të grupit Wagner njoftohet se kaloi në qytetin rus Voronezh, duke përparuar me shpejtësi drejt Moskës të shtunën, pasi, me sa duket, arritën të merrnin kontrollin e Rostov-on-Don-it, një qytet me më shumë se një milion banorë afër kufirit me Ukrainën.
Udhëheqësi i grupit Wagner, Yevgeny Prigozhin pohoi se luftëtarët e tij hynë në qytetin jugor rus të Rostov-on-Don, pa qenë nevoja për përdorimin e armëve dhe se askush nuk u vra gjatë asaj që ai e quan një “marshim drejtësie”. Pretendimet e tij nuk mund të verifikoheshin.
Presidenti rus Vladimir Putin u zotua se do ta shtypë atë që ai e quajti një kryengritje të armatosur, të cilën e krahasoi me Luftën Civile të Rusisë një shekull më parë.
Një gazetar i agjencisë Reuters pa helikopterët e ushtrisë ruse të hapin zjarr ndaj një autokolone të armatosur të grupit Wagner, ndërsa përparonin drejt qytetit Voronezh. Qyteti ndodhet rreth 520 kilometra në jug të Moskës.
Pasiguria ka mbretëruar rrugët e kryeqytetit rus, ndërsa janë vënë barriera në Sheshin e Kuq.
“Ambiciet e tepërta dhe interesat e veta kanë çuar në tradhti”, tha zoti Putin në një fjalim televiziv.
Ai paralajmëroi mercenarët e grupit Wagner të shtunën se rebelimi i armatosur është tradhti dhe kushdo që merr armët kundër Rusisë do të ndëshkohet.
Hetimi Kriminal
Të premten, Shërbimet Sekrete të Rusisë nisën një hetim penal ndaj Yevgeny Prigozhinit duke e akuzuar atë për krengritje të armatosur. Sipas kryeprokurorit rus, për këtë vepër penale parashikohet dënim me burg deri në 20 vjet.
Shërbimet sekrete ruse këmbëngulën se nuk ka asnjë fakt mbi akuzat e ngritura nga Prigozhini të premten se ministria ruse e mbrojtjes kreu sulm ajror ndaj një baze të Wagner-it duke vrarë 2 mijë mercenarë.
Zoti Prigozhin akuzoi ushtrinë ruse, se kishte vepruar sipas urdhrave të ministrit të Mbrojtjes Sergei Shoigu, për bombardimin e pozicioneve të trupave të tij në Ukrainë.
“Ministri i Mbrojtjes mbërriti posaçërisht në Rostov për të kryer një operacion për të shkatërruar Wagnerin”, shkroi ai në rrjetin sociale Telegram.
