Me debat mes palëve ka nisur mbledhja e Komisionit të Sigurisë, ku pritet të flasë kryetarja e Shërbimit Informativ Shtetëror (SHISH), Vlora Hyseni.
Deputeti demokrat, Ervin Salianji, ka kërkuar që mbledhja të zhvillohet me dyer të hapura, por kjo nuk është pranuar nga mazhoranca.
Po ashtu debat ka pasur edhe për kohën që iu duhen anëtarëve për “fjalën për procedurë”.
Nasip Naço, kreu i Komisionit të Sigurisë kërkoi minuta pushim ndërsa Salianji e akuzoi se kishin frikë të përballeshin me opozitën.
“Po ça frikë ore, dilni nga depresioni që jeni futur, ça frike kemi ne?”, ishte përgjigjja e Naço-s, i cili procedoi me minutat pushim.
Ndërkaq sot me përgjigjet e Hysenit do të vijë reagimi i parë të institucionit më të lartë të sigurisë në vend për çështjen e veriut të Kosovës.
Pas sqarimit të deputetëve demokratë dhe anëtarëve të tjerë të Komisionit të Sigurisë do të kemi edhe raportimin e parë për vitin 2022 të Shërbimit Informativ Shtetëror.
Në raportin e fundit, të dhënë nga ish-drejtori, Helidon Bendo, u shpalos vizioni i Shërbimit për të ardhmen.
Fokusi ka qenë dhe do të jetë forcimi i kapaciteteve operacionale dhe kibernetike për kundërvënien ndaj aktiviteteve të jashtëligjshme që kërcënojnë sigurinë kombëtare.
Bendo, asokohe vlerësoi bashkëpunimin shumë të mirë me SPAK, prokuroritë e rretheve, Policinë e Shtetit dhe institucionet e tjera.
Por ai vuri në dukje se ka veprimtari të shteteve ose shërbimeve të inteligjencës kundërshtare që ka vijuar me ndërthurje në rritje të aktiviteteve të inteligjencës me ato të natyrës hibride.
Këto shtete e shërbime jomiqësore me Shqipërinë, përdorin aktivitetet klasike dhe hibride për realizimin e synimeve të tyre – sipas SHISH.
A vazhdon situata e njëjtë edhe pas një viti?
Mbetet për t’u parë nga përgjigjet e Hysenit përpara Komisionit të Sigurisë.
