Ofensiva e shumëpritur ushtarake e Ukrainës është “e vështirë”, por është “duke bërë përparim”, tha presidenti ukrainas Volodymyr Zelensky pasi administrata e tij njoftoi se kishte rimarrë të paktën shtatë fshatra nga forcat ruse.
“Betejat janë të vështira, por ne po bëjmë përparim dhe kjo është shumë e rëndësishme”, tha presidenti ukrainas në fjalimin e tij. “Humbjet e armikut janë pikërisht në nivelin që na duhet”, shtoi ai. “Moti nuk është në favorin tonë, shiu na e vështirëson detyrën, por forca e ushtarëve tanë jep rezultate të mira”, saktëson Zelensky, duke përshëndetur kthimin e flamurit ukrainas në “zonat e sapoçliruara”.
Por ka një ndryshim të madh midis nisjes së një sulmi dhe një sulmi kryesor. Ofensiva ka filluar, por nuk mendoj se ka filluar as sulmi, thotë Ben Hodges, një gjeneral amerikan që parashikoi të gjitha fazat e konfliktit në Ukrainë.
Gjenerali deklaroi se kur të shihen formacione të mëdha dhe të blinduara që i bashkohen sulmit, atëherë do të jetë më se e qartë se ofensiva kryesore e ushtrisë ukrainase ka filluar vërtet.
“Unë nuk mendoj se kemi parë një përqendrim të tillë prej disa qindra tankesh dhe mjetesh luftarake të këmbësorisë në një sulm”, tha gjenerali amerikan, i cili shtoi se “një batalion tankesh ukrainas zakonisht ka 31 tanke. Një batalion i blinduar këmbësorie do të kishte pothuajse të njëjtin numër. Shtoni automjete të blinduara që transportojnë inxhinierë, mbrojtje ajrore, logjistikë etj. Një brigadë e blinduar ndoshta do të kishte tre batalione tankesh dhe një ose dy batalione të mekanizuar këmbësorie. Pra në total, një brigadë e blinduar do të ketë mbi 250 mjete të blinduara të llojeve të ndryshme”.
Sipas analistëve ushtarakë, Ukraina nuk e ka mobilizuar ende pjesën më të madhe të forcave të saj në një kundërofensivë të madhe. Aktualisht ende po testohet pjesa e përparme me sulme të synuara për të përcaktuar pikat e dobëta.
Moska, nga ana e saj, pretendon se ka zmbrapsur sulmet e Ukrainës në rajonin e Donetskut, pranë Velika Novosilka, si dhe pranë fshatit Levadna, afër Zaporozhye. Megjithatë kanë regjistruar humbje të nivelit të lartë. Gjenerali rus Sergei Goryachev, i cili komandonte trupat ruse në Ukrainën jugore, është vrarë në një sulm me raketa ukrainase, kanë raportuar blogerët ushtarakë rusë.
Shërbimi Federal i Sigurisë i Rusisë (FSB) tha sot se ka arrestuar një grup ish-zyrtarësh të Ministrisë së Mbrojtjes të dyshuar për ofrimin e informacioneve të klasifikuara ushtarake në Ukrainë dhe planifikimin e sulmeve sabotuese.
Shërbimi i sigurisë akuzoi ish-zyrtarët e paidentifikuar për spiunim për inteligjencën ushtarake ukrainase dhe për t’u ofruar atyre dokumente teknike dhe modele të përdorura për prodhimin e sistemeve të armëve dhe pajisjeve për forcat ajrore ruse.
Shërbimi Federal i Sigurisë i Rusisë tha në një deklaratë se i njëjti grup ishte gjithashtu i përfshirë në planet për të hedhur në erë infrastrukturën e transportit, siç janë linjat hekurudhore që dërgojnë furnizime për forcat ruse që luftojnë në Ukrainë.
