Gazetari Lavdrim Lita komentoi në Euronews Albania, arrestimin e ish-kryebashkiakut të Durrësit, Vangjush Dako, dhe peshën e tij elektorale brenda Partisë Socialiste.
Lita e cilësoi Dakon si një kampion elektoral me peshë shumë të madhe në zonën e Durrësit.
Sipas tij, dalja e Dakos nga jeta politike e dobëson ndjeshëm PS në këtë zonë, pasi 70% e strukturave drejtoheshin nga ai dhe njerëzit e tij.
Gjithashtu gazetari shtoi se dy kampionë të tjerë elektoral të cilët sigurojnë fitoren e Partisë Socialiste janë dhe Tom Doshi në Shkodër dhe Aqif Rakipi në Shqipërinë e mesme.
“Vangjush Dako është një kampion elektoral. Është një emërtim që unë kam dashur t’i vendos këtyre pasi duke studiuar skedën e tyre elektorale, këta janë persona që i sjellin fitoren Partisë Socialiste. Vangjush Dako, Aqif Rakipi dhe Tom Doshi janë 3 organizatorët më të fuqishëm të Partisë Socialiste në terren.
Nëse këto kampionë elektoral nuk ekzistojnë, janë të mënjanuar nga politika, maxhoranca dhe opozita luftojnë me mjete të barabarta. Vetë pushteti dhe qënia e Dakos në bashki, ka hedhur beton në Durrës prej vitit 1997 e deri më sot dhe ju e kuptoni rrjetin e ndereve dhe favoreve që ka krijuar. Unë e them me bindjes se PS në Durrës ka kolapsuar, komandohet nga Dako. Nëse ne heqim Dakon nga ekuacioni PS duhet të riorganizohet se nuk ekziston është në të njëjtin nivel me PD. Kjo gjë ndodh dhe në Shkodër dhe në Shqipërinë e mesme me këta kampionë elektoral”, tha Lita.
