Kina po përgatit një arsenal armësh të sofistikuara kibernetike me objektivin për të marrë kontrollin e satelitëve kundërshtarë, duke i paaftësuar ose rrëmbyer ata sipas dëshirës.
Zbulimi i shumëfishtë ushtarak mbi Kinën ka dalë nga Pentagon Leaks, disa ditë pas rrjedhjes së informacionit në lidhje me dronin spiun hipersonik kinez WZ-8, me sa duket i përdorshëm nga Pekini për të përshtatur strategjinë e tij ose për të kryer sulme me raketa. Zbulimi përmbahet në një dokument me logo të CIA-s , i rrjedhur në fillim të këtij viti, dhe me sa duket në një nga disa dosjet top-sekret të shpërndara në internet nga Jack Teixeira , një ish-aviator i Gardës Kombëtare Ajrore të Masaçusets tashmë i arrestuar.
Financial Times theksoi se arritja e një aftësie kibernetike kineze të kësaj natyre, siç është ajo e përshkruar në dokument, do t’i tejkalonte shumë sukseset e Rusisë në Ukrainë, ku ekipet e luftës elektronike të Kremlinit kanë adoptuar një qasje të orientuar drejt forcës brutale, por me pak efekt real. Lufta në Ukrainë ka treguar se sa të rëndësishëm janë satelitët për kryerjen e operacioneve ushtarake në skenarët operativë modernë. Në prag të pushtimit të 24 shkurtit 2021, sulmi masiv kibernetik rus kundër rrjetit ushtarak ukrainas ishte thelbësor për të siguruar sukseset e para të forcave ruse në terren, ashtu si rivendosja e aftësive kibernetike falë satelitëve SpaceX të Elon Musk ishte vendimtare për mbrojtjet e Kievit.
Mësime që po studiohen me shumë kujdes edhe nga Tajvani, i cili është i angazhuar në ndërtimin e një infrastrukture komunikimi satelitore të aftë për t’i mbijetuar një sulmi nga kinezët në rast pushtimi.
Konkretisht, sulmet e Kinës do të synonin të imitonin sinjalet që satelitët e armikut marrin nga operatorët e tyre, duke i ngatërruar ose duke i shkaktuar keqfunksionimin e tyre gjatë momenteve vendimtare të një lufte hipotetike.
Ushtria amerikane ka deklaruar zyrtarisht se Kina ka bërë përparim të rëndësishëm në zhvillimin e teknologjive hapësinore ushtarake. Dhe ish-zëvendësi i komandës kibernetike amerikane, gjenerali në pension Charlie Moore, tha se Kina po bën shumë përpjekje për t’i privuar SHBA-së epërsinë e saj në hapësirë dhe në hapësirën kibernetike.
Qëllimi i Pekinit është të realizojë “ëndrrën e tij hapësinore”: të bëhet fuqia e parë përtej atmosferës së Tokës deri në vitin 2045. Ushtria Çlirimtare Popullore ka aktualisht 347 satelitë, duke përfshirë 35 të lëshuar më të fundit me synimin për të monitoruar, gjurmuar, synuar dhe sulmuar forcat amerikane në çdo konflikt të ardhshëm.
