Ministria e Mbrojtjes e Rusisë konfirmoi se piloti i një aeroplani luftarak rus bombardoi pa dashje qytetin e Belgorod pranë kufirit me Ukrainën. Guvernatori i rajonit Vyacheslav Gladkov tha se shpërthimi la një krater të madh rreth 20 metra të gjerë në qendër të qytetit. Dy gra u plagosën dhe disa ndërtesa u dëmtuan nga bombardimi aksidental, tha ai. Gjuajtësi-bombardues Su-34 lëshoi aksidentalisht municionin e avionit, tha ministria.
Ndërsa ministria britanike e Mbrojtjes në raportin e saj të përditshëm për situatën në Ukrainë shkruan se, Kremlini njoftoi vizitën e presidentit rus Vladimir Putin në territorin e Ukrainës nën pushtimin rus, ku ai vizitoi forcat ruse të DFG në Dnieper. Ky është një nga përmendjet e para të ekzistencës së DGF. Në të njëjtën kohë, autoritetet ruse përdorën termin “forca” në një mënyrë të veçantë, gjë që tregon një formacion të madh operacional të organizuar sipas detyrave specifike. Ministria shtoi se në fillim të pushtimit, forcat ruse u organizuan në grupe të shpërndara sipas zonave të tyre ushtarake në Rusi – për shembull, grupet perëndimore dhe qendrore të forcave.
Ekzistenca e një DGF në dukje të re sugjeron që organizimi origjinal i forcës ka evoluar, ndoshta për shkak të humbjeve të mëdha. Misioni i DGF ka shumë të ngjarë të përbëhet nga mbrojtja e sektorit jugor të zonës së pushtuar, veçanërisht në pjesën jugperëndimore pranë lumit Dnieper.
Sekretari i Përgjithshëm i NATO-s, Jens Stoltenberg zhvilloi vizitën e tij të parë në Kiev që nga fillimi i pushtimit rus të Ukrainës për të treguar mbështetjen për vendin teksa përgatitet për një kundërsulm. Sekretari i Përgjithshëm vizitoi monumentin e ndërtuar për nder të ushtarëve ukrainas që vdiqën në luftimet e deritanishme dhe ekzaminoi pajisjet e dëmtuara ushtarake ruse të ekspozuara në sheshin qendror të Kievit.
Sekretari amerikan i Mbrojtjes Lloyd Austin tha dje se mbështetja e bashkësisë ndërkombëtare për Ukrainën “mbetet e fortë”. “Së bashku do të sigurojmë që Ukraina të ketë gjithçka që i nevojitet për të jetuar në liri. Çështja e “municioneve dhe armëve për mbrojtjen ajrore” do të jetë në qendër të diskutimeve të ditës” – tha Austin në hapjen e takimit në bazën amerikane në Gjermani.
Aleatët e Ukrainës, nën presionin e presidentit ukrainas Volodymyr Zelenskyi për të ofruar më shumë armë dhe municione, u takuan për të koordinuar ndihmën ushtarake për Kievin.
Takimi në bazën amerikane Ramstein, në jug të Gjermanisë, organizohet nga Austin, ku është i pranishëm edhe Sekretari i Përgjithshëm i NATO-s, Jens Stoltenberg, i cili pardje vizitoi Kievin.
