Pas publikimit javën e kaluar të dhjetëra dokumenteve të klasifikuara të Pentagonit, Ukraina ka ndryshuar disa nga planet e saj ushtarake.
Dokumentet që janë bërë publike vlerësojnë fuqinë e makinerisë ushtarake ruse, por gjithashtu lënë të kuptohet për mangësitë kritike të ushtrisë ukrainase.
Ndërsa autoritetet ukrainase i kanë hedhur poshtë dokumentet si “të rreme”, zyrtarët amerikanë kanë konfirmuar për New York Times dhe CNN se dokumentet janë të tyret, megjithëse disa prej tyre duket se janë ndryshuar. Një këshilltar i presidentit ukrainas, Mykhailo Podolyak, tha për Telegram se ai beson se dokumentet janë “të bazuara në një sasi të madhe informacioni të fabrikuar” dhe nuk kanë “asnjë lidhje me planet reale të Ukrainës”. ”
Dokumentet zbulojnë gjithashtu se Shtetet e Bashkuara spiunuan Presidentin Zelensky, gjë që i frustoi thellësisht autoritetet ukrainase, tha një burim i afërt me presidentin për CNN.
Rrjedhje të tilla si këto mund të ekspozojnë aftësitë, planet dhe strategjitë e afërta përpara ekzekutimit të tyre. Në rastin më të keq, ato mund të kushtojnë jetën e operativëve të inteligjencës dhe ushtarëve në operacionet ushtarake.
Komandanti i forcave tokësore të Forcave të Armatosura të Ukrainës, Oleksandr Sirsky, tha se forcat ruse në Bakhmut kishin filluar të përdorin taktikat e “tokës së djegur”, duke shtuar se situata në qytet ishte e vështirë, por nën kontroll.
“Armiku ka kaluar në të ashtuquajturën taktikë të tokës së djegur “siriane”. Ata shkatërrojnë ndërtesa dhe pozicione me sulme ajrore dhe zjarr artilerie. Mbrojtja e Bahmutit vazhdon. Situata është e vështirë, por nën kontroll”, tha Sirski. Sirski theksoi se ushtarët ukrainas i lodhën anëtarët e grupit paraushtarak rus Wagner, kështu që Rusia u detyrua të përfshijë forcat speciale dhe njësitë ajrore në betejën për Bakhmut.
Sipas raportimeve, më 9 prill, Sirski vizitoi sektorët më të vështirë të frontit Bakhmut. “Toka e djegur” është një përcaktim për një strategji ushtarake në të cilën gjithçka që mund të jetë e dobishme për armikun shkatërrohet qëllimisht gjatë tërheqjes.
