Gratë shqiptare preferojnë më shumë lindjet me operacion, sesa ato në mënyrë natyrale. Sipas specialistëve, edhe pse jo në shifra shumë të larta si nëpër Evropë, trendi vjen gjithnjë e në rritje në maternitetet publike.
“Në statistika është 38%, dua të theksoj që kjo lloj dukurie nuk është vetëm në Shqipëri, por në të gjithë botën. Ka vende që mund ta kenë 50% lindjen, domethënë gjysma e grave lindin me operim dhe gjysma lindje normale.Ky trend është në këtë qasje dhe arsyet janë të shumta.”
Disa nga faktorët që ndikojnë janë karriera apo dhe familja e vogël theksojnë specialistët.
“Më shumë mendoj se janë nënat që ndjekin karrierë, një shtatzani e dëshiruar normalisht e ka përfundimin drejt lindjes me operacion, ndoshta ndonjëherë dhe për sigurinë e personelit. Zgjedhin të jenë familje me numër të vogël fëmijësh, në një kohë pak më të largët nga normalja e fillimit të një shtatzënie.”
Lindje me operacion apo natyrale? Ja çfarë rekomandon mjekja.
“Zgjedhja më e mirë do të ishte një lindje normale, është bashkëpunimi me pacient sepse nëse një grua nuk e kultivon mendimin se përfitimi nga lindja normale janë shumë më të mëdha sesa ajo me operacion, normalisht kur ndodhet para fenomenit të lindjes është e papërgatitur.”
Shifrat e lindjeve me operacion mund të jenë edhe më të larta, pasi një pjesë e konsiderueshme e grave i drejtohen edhe spitaleve private brenda dhe jashtë vendit.
