Presidentja e Komisionit Evropian, Ursula von der Leyen, tha sot se qëndrimi i Kinës ndaj luftës në Ukrainë do të jetë një “faktor vendimtar për marrëdhëniet BE-Kinë”.
Kina, si një anëtare e përhershme e Këshillit të Sigurimit të OKB-së, ka përgjegjësinë të luajë një rol konstruktiv në promovimin e paqes bazuar në integritetin territorial të Ukrainës, me tërheqjen e forcave ruse, tha presidenti i KE.“Çdo plan paqeje që konsolidon aneksimet ruse nuk është thjesht një plan i qëndrueshëm”, tha Von der Leyen në një fjalim në Bruksel përpara se të nisej për në Pekin. Kreu i KE tha se “faktori vendimtar për vazhdimin e marrëdhënieve mes BE-së dhe Kinës do të jetë mënyra se si Kina do të vazhdojë të sillet ndaj luftës së Putinit”.
Kryeredaktori i “Novaya Gazeta” dhe fituesi i Çmimit Nobel për Paqen, Dmitry Muratov, është i shqetësuar se deri ku do të shkojë Kremlini në përballjen me Perëndimin. “Dy breza jetuan pa kërcënimin e luftës bërthamore”, tha Muratov. “Por kjo periudhë ka përfunduar. A do ta shtyp Putin butonin bërthamor apo jo? Kush e di? Askush nuk e di këtë. Nuk ka asnjë person që mund të thotë me siguri”.
Zyrtarët e lartë hodhën poshtë sugjerimet e pakuptimta se vendet perëndimore që armatosin Ukrainën nuk duhet ta shtyjnë Rusinë shumë larg. Pak ditë më parë, presidenti rus Vladimir Putin njoftoi planet për të vendosur armë bërthamore taktike në Bjellorusi. Më pas, një nga bashkëpunëtorët e tij më të ngushtë, Nikolai Patrushev, paralajmëroi se Rusia kishte “armë moderne unike të afta për të shkatërruar çdo armik, përfshirë Shtetet e Bashkuara”.
“Ne shohim se si propaganda shtetërore i përgatit njerëzit të mendojnë se lufta bërthamore nuk është gjë e keqe”, thotë nobelisti rus. “Kanalet televizive këtu promovojnë luftën bërthamore dhe armët bërthamore sikur të reklamonin ushqimin e kafshëve. Ata shpallin: “Ne kemi këtë raketë, atë raketë, një lloj tjetër rakete.” Ata flasin për shënjestrimin e Britanisë dhe Francës, për shkaktimin e një cunami bërthamor që të shpërndajë Amerikën. Pse e thonë këtë? Që njerëzit këtu të jenë të përgatitur”.
Në televizionin shtetëror rus kohët e fundit, një drejtuese e njohur talk show sugjeroi që Rusia “duhet të deklarojë çdo objektiv ushtarak në territorin e Francës, Polonisë dhe Mbretërisë së Bashkuar si një objektiv legjitim të Rusisë”. “Njerëzit në Rusi janë të rrezatuar nga propaganda,” thotë Muratov. “Propaganda është një lloj rrezatimi. Të gjithë janë të ndjeshëm ndaj tij, jo vetëm rusët. Në Rusi, ka dymbëdhjetë kanale televizive, dhjetëra mijëra gazeta, media sociale si VK [versioni rus i Facebook] që i shërbejnë plotësisht ideologjisë shtetërore.
