Rrëfimet e Princ Harry në librin e tij “Spare” kanë shkaktuar jo pak trazira në Familjen Mbretërore Britanike. Ai zbulon një gamë të gjerë bisedash private midis tij dhe anëtarëve të tjerë mbretërorë britanikë dhe detajet e ndarjes së tij nga familja. Ndoshta zbulimi më dramatik që u shfaq ishte akuza për një grindje me vëllain e tij, Princin William gjatë një debati për gruan e tij, Meghan, Dukeshën e Sussex-it në vitin 2019.
Përleshja e supozuar ndodhi pas një bisede mes dy vëllezërve, gjatë së cilës William, trashëgimtari i fronit britanik, e quajti Meghan “të vështirë”, “të vrazhdë” dhe “gërryese”.
“Ai e uli gotën ujit, më thirri me një emër tjetër dhe më pas erdhi drejt meje. Gjithçka ndodhi kaq shpejt. Pra shumë shpejt. Më kapi për jake duke ma grisur dhe më rrëzoi në dysheme. U shtriva për një moment, i trullosur, më pas u ngrita në këmbë dhe i thashë të dilte jashtë”, tregon Harry në libër.
Harry thekson në libër se Uilliam e nxiti atë të kundërpërgjigjet, por ai refuzoi ta bënte këtë. “William u largua, por më vonë u kthye i penduar dhe kërkoi falje”, tregon ai.
Zbulime të tjera të bujshme përfshijnë përmendjen e numrit të luftëtarëve talebanë që ai vrau ndërsa shërbente në Afganistan, si dhe përdorimin e lëndëve narkotike në adoleshencë.
Princi Harry pretendon se ka vrarë 25 persona ndërsa shërbente me ushtrinë britanike në Afganistan, duke thënë se në vapën e luftimeve ai i shihte objektivat e tij si “gurë shahu” dhe jo si njerëz.
“Pra, numri im është 25. Nuk është një numër që më mbush me kënaqësi, por as nuk më vë në siklet”, thotë ai.
Harry thotë gjithashtu se ai shikonte pamjet e çdo “vrasjeje” pas kthimit në bazë, nga kamera e montuar në helikopterin e tij Apache, dhe se në “rrëmujën dhe konfuzionin e luftimeve” ai i shihte ata që vrau si “të këqijtë që u eliminuan përpara se të vrisnin të mirët”.
Një tjetër pjesë nga libri rrëfen se si Harry thuhet se “iu lut” babait të tij që të mos martohej me Camilla, e cila tani është Queen Consort, dhe kishte frikë se ajo do të ishte një “njerkë e ligë”.
Harry kujton se ai dhe William thanë se do ta mirëpritnin Camilla-n në familje, por i kërkuan babait të tyre që të mos martohej me të, duke e quajtur Camilla-n “gruaja tjetër”.
“Mbaj mend që pyesja veten… nëse ajo do të ishte mizore me mua; nëse do të ishte si të gjitha njerkat e liga në tregime. Ëilly kishte qenë dyshues për ‘Gruan Tjetër’ për një kohë të gjatë, gjë që e hutoi dhe e mundonte. Kur ato dyshime u konfirmuan, ai ndjeu keqardhje të madhe që nuk kishte bërë apo thënë asgjë më parë”, shkruan Harry.
Ai gjithashtu e krahason takimin me të për herë të parë me marrjen e një injeksioni, duke shkruar në libër, “mbylli sytë dhe as nuk do ta ndjesh”. Pallati Kensington dhe Pallati Buckingham nuk kanë bërë asnjë reagim mbi akuzat e Harryt./ CNN
