Kompania e inteligjencës artificiale Anthropic njofton se bllokoi disa tentativa për të përdorur teknologjinë e saj të inteligjencës artificiale për kërkime të cilat mund të mbështesin zhvillimin e armëve biologjike, sipas një raporti të ri nga kompania.
Anthropic, kompania që qëndron pas asistentit Claude AI, tha se kishte zbuluar dhjetëra raste të përdorimit potencialisht dashakeq të modeleve të saj të IA-së që nga dhjetori 2025, përfshirë disa shembuj të asaj që kompania e përshkroi si “keqpërdorim biologjik”.
Raporti detajon pesë studime rastesh të cilat përfshijnë përdorimin e modeleve të Anthropic në mënyra që kompania tha se mund të mbështesin zhvillimin e armëve biologjike.
Në një rast, Anthropic tha se një studiues jashtë Shteteve të Bashkuara të Amerikës iu afrua Claude nga një rajon ku asistenti i inteligjencës artificiale nuk mbështetet dhe e përdori modelin gjatë kërkimit mbi gripin e shpendëve shumë patogjen.
Sipas kompanisë, kërkimi u përqendrua pjesërisht në përshtatjen e virusit tek gjitarët.
Anthropic tha se hulumtimi ishte qartësisht me përdorim të dyfishtë në natyrë, duke nënvizuar se të kuptuarit se si përshtatet virusi mund t’i ndihmojë shkencëtarët të identifikojnë variante natyrale që shfaqen me potencial pandemie, por gjithashtu mund të prodhojë informacione që potencialisht mund të përdoren për ta bërë një virus më të rrezikshëm.
Anthropic tha se kishte ndaluar llogaritë e lidhura me rastet, por theksoi se nuk mund të përcaktonte nëse studiuesit kishin për qëllim të shkaktonin dëm.
“Ne nuk pohojmë se ata kishin qëllim dëmtimi,” tha kompania.
Kjo nuk është hera e parë që Anthropic publikon një raport i cili detajon keqpërdorimin e mundshëm të Inteligjencës Artificiale. Kompania ka lëshuar tre vlerësime të mëparshme të kërcënimeve që detajojnë përdorimet keqdashëse të IA-së.
Raporti i fundit u publikua disa ditë pasi ish-studiuesi i Anthropic dhe OpenAI, Jacob Coxon, foli publikisht për shqetësimet e tij në lidhje me sistemet gjithnjë e më të fuqishme të inteligjencës artificiale.
“Aftësitë e inteligjencës artificiale, mund të shkaktojnë kaos ekstrem, për shembull, duke hakuar infrastrukturën kritike, duke ndërtuar armë biologjike në nivel zhdukjeje”, tha Coxon për CNN.
