Një rast i pazakontë është regjistruar në Urgjencën e Spitalit Universitar të Traumës në Tiranë, ku një grua shtatzënë u paraqit për ndihmë mjekësore, duke qenë se kjo ishte struktura spitalore më e afërt.
Stafi mjekësor i Spitalit Universitar të Traumës reagoi menjëherë, duke koordinuar situatën me ekipin e Maternitetit “Koço Gliozheni”.
Ndërkohë, mjekët e Traumës ndërhynë për t’i ofruar gruas kujdesin e nevojshëm mjekësor dhe për të menaxhuar situatën deri në koordinimin me ekipin e specializuar të maternitetit.
Falë ndërhyrjes në kohë, bashkëpunimit mes ekipeve mjekësore dhe koordinimit ndërinstitucional, nëna dhe foshnja janë në gjendje të mirë shëndetësore.
Edhe pse Spitali Universitar i Traumës është një strukturë e specializuar kryesisht në trajtimin e pacientëve me trauma, rasti tregon rëndësinë e dhënies së ndihmës së menjëhershme, veçanërisht në situata urgjente.
Një rast që dëshmon edhe një herë rëndësinë e bashkëpunimit mes strukturave shëndetësore në situatat urgjente, ku çdo minutë mund të jetë vendimtare.
