Shërbimi i Inteligjencës së Brendshme Britanike (MI5) i njoftoi parlamentarët për përpjekjet për spiunazh dhe rekrutim nga Kina, njoftoi ministri përgjegjës për Sigurinë, Dan Jarvis.
Ai zbuloi një sërë masash që synojnë mbrojtjen më të mirë të zyrtarëve të zgjedhur.
“Më herët sot, MI5 lëshoi një alarm spiunazhi për parlamentarët, për t’i paralajmëruar ata për shënjestrimin e vazhdueshëm të institucioneve tona demokratike nga aktorët kinezë”, deklaroi ministri para deputetëve në Dhomën e Komunëve.
Ky alarm vjen disa javë pas polemikave të ngritura nga rrëzimi i akuzave kundër dy burrave, përfshirë një që punonte në Parlamentin Britanik, të dyshuar për spiunazh në dobi të Pekinit.
Qeveria e Partisë Laburiste është akuzuar për prishjen e gjyqit të tyre për të mbrojtur marrëdhëniet e saj me Kinën, të cilat i ka mbrojtur gjithmonë me vendosmëri.
Sipas ministrit, agjentët kinezë po përpiqen “të rekrutojnë dhe të kultivojnë marrëdhënie me individë që kanë akses në informacione të ndjeshme rreth parlamentit dhe qeverisë, për shembull duke u shtirur si ‘rekrutues’ të jashtëm”.
Këto përpjekje mund të kenë në shënjestër edhe asistentë parlamentarë, ekonomistë, punonjës të think-tank-eve, konsulentë gjeopolitikë ose nëpunës civilë, shtoi ai.
