Këngëtarja e njohur shqiptare, Bleona Qereti, ka ngritur një padi për shpifje në Gjykatën e Lartë të Nju Jorkut kundër aktivistet Evi Kokalari.
Deklarata në fjalë është shpërndarë sot nga zyra e avokatëve amerikanë që përfaqësojnë Qeretin, ku kërkohet edhe një dëmshpërblim prej 2 milionë dollarësh.
Në dokument, thuhet se që prej vitit 2022, Kokalari ka nisur një “fushatë të vazhdueshme shpifjesh, sulmesh dhe dezinformimi” ndaj këngëtares, me qëllim që “ta dëmtonte në karrierë dhe në jetën personale”.
“Veprimet e Evi Kokalarit kanë qenë të qëllimshme, të përllogaritura dhe dashakeqe, duke shkaktuar dëm të pariparueshëm në reputacionin dhe imazhin publik të Bleonës, si në SHBA ashtu edhe në Shqipëri”, thuhet në njoftim.
Në padi theksohet se kjo fushatë shpifjesh ka përfshirë publikimin e deklaratave degraduese në rrjete sociale, tentativat për bojkot të eventeve ku Qereti ishte e ftuar dhe përhapjen e dezinformatave te figura të njohura politike në SHBA dhe Shqipëri, “me synim përfitime personale dhe dëmtimin e imazhit të saj”.
