Këshilltarii Demokratëve Euroatlantikë në bashkinë Vlorë, Gjergji Nika, ka kritikuar projekt-vendimin e Bashkisë për dhënien me qira të 831 hektarëve kullotë në zonën Shashicë-Gumenicë për projekte energjie të rinovueshme.
Ai e cilëson këtë vendim “abuziv dhe të pasqaruar” për qytetarët dhe këshilltarët. Nika akuzon kryetarin e bashkisë për nxitim dhe për përfshirje të interesave të ngushta politike dhe ekonomike.
Ai shtron pyetje mbi transparencën e procesit dhe ndikimin në trashëgiminë kulturore dhe turizmin e Vlorës. Sipas tij, këshilltarët socialistë duhet ta kundërshtojnë këtë projekt për të mbrojtur interesat e qytetit dhe të qytetarëve.
Postimi i Gjergji Nika:
Vlora nuk është e disa “socialistëve”, që nuk janë as nga Vlora!
Në mbledhjen e Konferencës së Kryetarëve është paraqitur një projekt- vendim nga Bashkia numër 18898 i datës 20.11.2024, me të cilin kryetari i bashkisë i kërkon këshillit bashkiak që 831 hektarë, sipërfaqe kullotë në zonën Shashicë – Gumenicë t’u jepen me qira për 10 vjet subjekteve që janë interesuar pranë ministrisë për ta përdorur për veprimtari fotovoltaike dhe eolike.
Ky vendim u tërhoq për dëgjesë publike dhe do të risillet në mbledhjen e muajit Dhjetor.
Projekt- vendimi në mendimin tim është totalisht abuziv dhe i pasqaruar për këshilltarët dhe qytetarët pasi bashkia thotë: “Ma jepni mua, se pastaj di unë kujt ia jap!”
Gjatë mbledhjes këshillit te rregullimit te territorit në 31 korrik 2024 u janë dhënë në zonën e Vlorës 5 firmave të shfrytëzimit të impianteve eolike dhe fotovoltaike nga 3 mw secila dhe, po këto të pesta në 13/09/2024 kanë marrë “ok” (miratimin) nga Instituti i Trashëgimisë Kulturore për të lejuar vendosjen e tyre edhe pse në zona të mbrojtura.
Dua të shtroj disa pyetje!
Me çfarë tagri bashkia do të administrojë e shpërndajë si t’i dojë pronat e qytetit të Vlorës, kur asetet e bashkisë i ka Këshilli Bashkiak?
Normalisht që jemi pro investimeve, por cilido investitor shfaq interes, projektet apo propozimet i paraqet në bashki dhe bashkia i sjell në Këshillin Bashkiak për diskutim e miratim!
Pse nxiton kryetari i bashkisë?
Mos vallë për të realizuar këto projekte ka ardhur?
Përse vijnë në Vlorë?
Për të përfituar apo për të kontribuar për Partinë Socialiste?
Për të shkatërruar ekosistemin dhe gjithë trashëgiminë tonë kulturore?
Për të ndërtuar një turizëm apo ekonomi sipas modeleve, të cilat nuk janë të përshtatshme e efektive për Vlorën?
Pse nxiton bashkia ta marrë këtë parcelë dhe ta shpërndajë sipas orekseve dhe interesave të Ministrisë së Energjitikës dhe Infrakstrukturës?
Mos të harrojmë se në të gjitha kompanitë e interesuara për këtë projekt, pothuajse del emri i një aksioneri, i cili ka lidhje të ngushta me ish- drejtuesin politik të PS së Vlores, lidhje që datojnë që prej vitit 2015.
Këshilltarët socialistë kurrsesi nuk duhet ta miratojnë këtë projekt, pasi nuk janë rritje pagash, ndryshim strukturash, por janë projekte, të cilat do ta penalizojnë qytetin dhe turizmin tonë për 30 vitet e ardhshme.
Këshilltarët socialistë nuk duhet ta marrin përsipër këtë njollë e përgjegjësi e as të lejojnë të përdoren për ca interesa të ngushta që mund të kenë.
Nëse duan që të qarkullojnë me kokën lart në qytet e pa ndjerë turp përpara bashkëqytetarëve të tyre nuk duhet ta miratojnë!
Vlora nuk është vetëm e disa “socialistëve” që nuk janë as nga Vlora.
Vlora është e vlonjatëve dhe e gjithë Shqipërisë! E fëmijëve tanë!
Në asnjë vend të botës zhvillimi nuk presupozon shkatërrimin e turizmit, por zhvillimi bëhet ndryshe.
Në asnjë vend zhvillimi nuk do të thotë të japësh qytetin e të ardhmen e tij e të qytetarëve me konçesion e të ngelesh peng i disa interesave apo synimeve okulte!
Mos vallë kjo është pjesë e një projekti më të madh që duan ta bëjnë këtë gjë, ta kthejnë Vlorën të “zhvilluar e turistike” dhe çdo lloj investimi shtesë ta çojnë vetëm pas tunelit të Llogarasë dhe vetëm në shërbim të oligarkëve të caktuar “pranë PS”?
Dhe qytetin e Vlorës ta lenë kështu siç është, në gropë, siç e thotë edhe kënga dhe përballë malit me pasqyra?
