Euronews Albania, një media serioze në vend, ka disa vite që bën sondazhe të ndryshme politike e jo politike për të lexuar realitetin faktik të gjërave.
Sondazhet nuk janë shkencë ekzakte që të tregojnë të vërtetën faktike. Maksimumi mund të masin trende dhe të përcaktojnë strategji për të maksimizuar apo minimizuar një dëshirë.
Mbrëmjen e djeshme te ishte bërë një përpjekje statistikore për të lexuar dëshirat e votuesve të djathtë, posaçërisht të Partisë Demokratike, se cilin donin të ishte potecial/ kandidat për kryeministër apo cili ishte më i pëlqyer në elektorat.
Sali Berisha dhe Lulzim Basha dilnin poshtë në pëlqyeshmëri, ndërsa Jorida Tabaku dilte lart.
Si lexohet kjo?
Lexohet me pëlqyeshmëri dhe jo me votëshmëri. Një gjë është të jesh i pëlqyeshëm dhe një gjë të jesh i votueshëm. Njerëzit mund të pëlqejnë Arlin Qorrin dhe nuk e votojnë në zgjedhje sepse zgjidhja e tij është anakronike, neokomuniste dhe dëmshme. Njerëzit mund të pëlqejnë Endri Shabanin për përgatitjen intelektuale dhe qëndrimet publike, por e kanë të vështirë ta votojnë sepse mendojnë se nuk është gati apo vota e tyre mund të shkojë dëm. E njëjta gjë me Adriatik Lapajn apo të tjerë që janë të pëlqyeshëm por tek dita e votës gjërat ndryshojnë sepse ka ligjësi të tjera…
E para është ligjësia e Partisë. Pa lidership. Pa kandidatë PD zyrtare mori 104 mijë vota; me lidership Berisha-Meta Foltorja mori 250 mijë vota. Pra, liderët e formacioneve klasike nisen në avantazh në krahasim me individët apo partitë e reja. Janë gjëra racionale.
