Ndryshimi i sistemit zgjedhor me referendum ka bashkuar partitë e vogla në një tryezë. Këtë iniciative e mori Nisma Thurrje, e cila propozon aplikimin e një sistemi zgjedhor proporcional me katër ose më pak zona zgjedhore dhe lista të hapura 100%, për kandidatët preferencial. Në takim morën pjesë jo vetëm aleatët e Partisë Demokratike por edhe parti të tjera të interesuara. Përfaqësuesi i PD Rezart Kthupi ka deklaruar se, të dy rrugët, referendum apo komisioni i Reformës zgjedhore, janë dy rrugët për të arritur më shpejt në rezultatin e kërkuar. 
12 propozimet e 4 partive opozitare për ndryshimin e sistemit zgjedhor:
1. Aplkimi i një Sistemi Zgjedhor Proporcional me katër ose më pak zona zgjedhore, duke respektuar ndarjen politike dhe ekonomike të rajoneve në Shqipëri.
2. Formula e shpërndarjes së mandateve të ndryshojë nga D’Hondt, ku pjesëtimi shkon në favor të partive të mëdha, në Saint Lague ku pjesëtimi me numra tek garanton një përfaqësim më të drejtë duke minimizuar deformimin e vullnetit të zgjedhësve.
3. Subjektet zgjedhore të garojnë me me lista plotësisht të hapura, pa kufizuar preferencat e votuesit (i.e. shfuzimi i herësit në shpërndarjen e mandateve)
4. Zgjedhësi të ketë mundësi të zgjedhë brenda të njëjtës listë deri në 5 kandidatë preferencial (sipas modelit të vendeve të tjera psh Kosovës)
5. Fleta e votimit të përmbajë detyrimisht emrat e kandidatëve garues në listat garuese të subjekteve zgjedhore
6. Zëvendësimi i pragut kombëtar me pragun ligjor rajonal, i cili nuk mund të jetë më shumë se 1% e votave të marrë në rang rajoni
7. Aplikimi i sistemit proporcional preferencial, me dy preferenca, për zgjedhjet për kryetarin e bashkisë
8. Aplikimi i sistemit zgjedhor proporcional me lista të hapura për këshillat bashkiak (njësoj si për zgjedhjet e përgjithshme)
9. Votimi i shqiptarëve të diasporës përmes postës, sipas modelit të aplikuar në vendet e zhvilluara.
10. Votimi elektronik pranë vendbanimit të përkohshëm, ose me postë, për shtetasit shqiptarë që jetojnë përkohësisht brenda Shqipërisë por larg rezidencës së tyre të përhershme
11. Ulja e moshës minimale për të ushtruar të drejtën e votës që në moshën 16 vjeçare, e cila është mosha e përgjegjësisë ligjore
12. Aplikimi i kufizimeve proporcionale në organizmin e fushatës zgjedhore edhe në sektorin privat, përveç kufizimeve që aktualisht aplikohen në sektorin publik (si psh hapësira mediatike, reklamat dhe billboardet)
