Ish-deputeti Eduart Ndocaj është vënë nën procedim penal nga Policia e Shtetit, pas publikimit të videove në rrjetet sociale, ku ofronte shpërblime financiare për veprime të dhunshme ndaj përfaqësuesve politikë.
Sipas njoftimit zyrtar të Policisë, 51-vjeçari, banues në Shëngjin, po procedohet për veprat penale “Thirrje publike për veprime të dhunshme” dhe “Thirrja për urrejtje nacionale”. Materialet për rastin janë referuar në prokurori për veprime të mëtejshme.
Çështja lidhet me videot e publikuara nga Ndocaj, ku ai ofronte 5 mijë euro për këdo që do të hidhte një deputet në koshin e plehrave, si dhe shuma më të larta për veprime të ngjashme ndaj ministrave dhe kryeministrit Edi Rama. Deklaratat e tij u përhapën gjerësisht në rrjetet sociale.
Procedimi penal vjen në një klimë të tensionuar politike, pas protestave të javëve të fundit dhe deklaratave të forta publike. Policia i ka cilësuar videot si thirrje për veprime të dhunshme ndaj përfaqësuesve të zgjedhur dhe anëtarëve të Këshillit të Ministrave.
Deri në këtë fazë, bëhet fjalë për procedim penal dhe jo për një vendim fajësie nga gjykata. 
