Haaretz raportoi se “vendimi i shefit të Mossad-it Roman Gofman për të shkarkuar dy zyrtarë të lartë të Mossad-it ka çuar në një atmosferë ‘trazirash dhe çrregullimi’ në agjenci, duke përfshirë si të lartët ashtu edhe të ultit, i kanë thënë Haaretz burime të njohura me vendimmarrjen në agjenci.
Një nga këto burime tha se ‘Gofman mori një vendim frikacak që kishte për qëllim të shërbente interesat e Kryeministrit Benjamin Netanyahu përpara zgjedhjeve.’
Një burim tjetër i informuar tha se vendimi nuk buronte nga motive politike. ‘Çdo kreu i një agjenie sigurie ka të drejtë të vendosë njerëz në të cilët mbështetet në pozicione kyçe.’ Vendimi për të shkarkuar dy zyrtarët e lartë u mor pas tentativës së dështuar për të rrëzuar regjimin iranian.
Megjithatë, burimi vuri në dukje se vetë Gofman ishte një nga mbështetësit kryesorë të planit për të zëvendësuar regjimin në Iran kur shërbente si sekretar ushtarak i Netanyahut. Sipas këtij burimi, shefi i Mossad-it vendosi shkarkimin tani për të lejuar Netanyahun të shmangë marrjen e çdo përgjegjësie për faktin se qeveria në Teheran nuk ra pavarësisht luftës. Zyrtarë të tjerë argumentojnë se plani i Mossad-it për të zëvendësuar qeverinë nuk dështoi, pasi nuk u zbatua kurrë.
Një burim i njohur me planin pretendon se Presidenti amerikan Donald Trump nuk dha miratimin e tij për elementet kyçe të planit, të cilat përfshinin futjen e forcave kurde të armatosura në Iran.”
