Qeveria gjermane ka miratuar një projektligj që synon zgjerimin e kompetencave të shërbimeve të inteligjencës, në një kohë kur Berlini përballet me kërcënime të shtuara ndaj sigurisë kombëtare.
Nisma, e cila ende duhet të miratohet nga parlamenti, parashikon lehtësimin e disa kufizimeve të vendosura pas Luftës së Dytë Botërore dhe rritjen e aftësive operacionale të shërbimeve gjermane.
Ministri i Brendshëm, Alexander Dobrindt, e cilësoi reformën si “historike”, duke argumentuar se Gjermania duhet të ketë shërbime inteligjence më të afta për t’u përballur me terrorizmin, ekstremizmin dhe kërcënimet nga shtete të huaja.
Reforma vjen pas disa ngjarjeve të rënda të sigurisë. Në fund të korrikut, një automjet u përplas gjatë paradës së Krenarisë në Berlin, ndërsa javën e kaluar u zbulua një dron i dyshuar i ngarkuar me eksplozivë pranë një avioni mallrash ukrainas në aeroportin Leipzig/Halle.
Sipas projektligjit, Shërbimi Federal i Inteligjencës (BND) do të marrë kompetenca të reja për t’u përballur me kërcënime nga vende si Rusia dhe Kina. Përfshihet edhe përdorimi më i gjerë i inteligjencës artificiale, mbledhja dhe analizimi i sasive më të mëdha të të dhënave, si dhe mundësia për ndërhyrje në sulme kibernetike.
Një nga masat më të debatueshme është mundësia për të kryer operacione “hack-back”, përfshirë manipulimin ose fshirjen e të dhënave të përdorura në sulme kibernetike.
Edhe Zyra për Mbrojtjen e Kushtetutës (BfV) pritet të ketë më shumë hapësirë për mbledhjen dhe analizimin e informacionit, ndërsa do të lehtësohen disa procedura për mbikëqyrjen online dhe monitorimin e personave të dyshuar.
Qeveria synon që ligji të hyjë në fuqi deri më 1 janar 2027, ndërsa paralelisht parashikohet edhe forcimi i mekanizmave të mbikëqyrjes së shërbimeve të inteligjencës
