Starship përfundon me sukses fluturimin e 13-të testues, i pari pas daljes së SpaceX në bursë
Raketa gjigante Starship e kompanisë SpaceX përfundoi me sukses fluturimin e saj të 13-të testues, duke shënuar misionin e parë që nga dalja e kompanisë së Elon Musk në bursën e Wall Street në muajin qershor.
Anija kozmike u ul në Oqeanin Indian, ndërsa punonjësit e SpaceX në qendrën Starbase në Teksas e pritën me entuziazëm përfundimin e misionit.
Elon Musk njoftoi në rrjetin social X se “Starship është e paprekur, po noton në oqean dhe po transmeton të dhëna telemetrike.”
Ky ishte fluturimi i 13-të testues i raketës, e cila konsiderohet më e fuqishmja në botë. Testet e mëparshme kishin përfunduar me shpërthime gjatë uljes, djegie të mjetit ose shpërbërje në ajër.
Starship, e cila është rreth 122 metra e lartë, lëshoi 20 satelitë Starlink në një orbitë nënorbitale.
Satelitët u lidhën për një kohë të shkurtër me rrjetin e SpaceX, që përbëhet nga rreth 10 mijë satelitë në orbitë, përpara se të rihynin në atmosferën e Tokës dhe të digjeshin sipas planit të misionit.
Sipas SpaceX, fluturimi njëorësh do të sigurojë të dhëna të rëndësishme për zgjerimin e konstelacionit të satelitëve Starlink, që ofron internet satelitor.
Kompania synon që deri në fund të vitit 2026 të përdorë raketën Starship për të vendosur në orbitë satelitët e rinj Starlink V3, me qëllim zgjerimin e mbulimit të internetit në zonat e largëta ku rrjetet tradicionale celulare nuk janë të disponueshme.
