Rregullatorët italianë kanë nisur hetime ndaj Sephora dhe Benefit Cosmetics për përdorimin e dyshuar të strategjive të fshehta të marketingut, të cilat synojnë shitjen e produkteve të bukurisë tek vajzat e reja. Këto praktika, sipas autoriteteve, mund të nxisin një sjellje të pashëndetshme ndaj kujdesit për lëkurën, e njohur si “kozmetikereksi”.
Autoriteti Italian i Konkurrencës njoftoi se po analizon mënyrën e promovimit të produkteve si maska fytyre, serume dhe kremra kundër plakjes, të cilat në disa raste duket se u drejtohen vajzave nën moshën 10 vjeç.
“Këto praktika lidhen me çështjen më të gjerë të ‘kozmetikoreksisë’, një obsesion me kujdesin e lëkurës tek të miturit”, tha autoriteti.
Sipas rregullatorit, markat, të dyja pjesë e grupit francez LVMH, dyshohet se kanë përdorur një strategji marketingu mjaft të fshehtë.
Kjo përfshin edhe përdorimin e mikro-influencuesve shumë të rinj që inkurajojnë blerjen kompulsive të kozmetikës midis të rinjve, një grup veçanërisht i prekshëm.
Autoritetet, së bashku me policinë financiare italiane, kanë kryer kontrolle në ambientet e Sephora Italia dhe në zyra të tjera të LVMH.
Ndërkohë, fenomeni i njohur si “Sephora kids” është përhapur gjerësisht në rrjetet sociale, duke treguar lidhjen e fortë mes fëmijëve paraadoleshentë dhe produkteve të bukurisë luksoze. Platforma si TikTok dhe Instagram janë të mbushura me përmbajtje nga vajza dhe adoleshente që diskutojnë rutinat e kujdesit për lëkurën dhe grimin.
Megjithatë, Sephora ka tentuar të distancohet nga ky trend. Artemis Patrick, drejtoresha ekzekutive e Sephora North America, deklaroi në vitin 2024 se ne nuk i tregtojnë kësaj audience.
Dermatologët kanë shprehur shqetësime për këtë trend, duke theksuar se fëmijët nuk kanë nevojë për produkte kozmetike dhe se fokusi i hershëm te pamja mund të shkaktojë ankth.
Ata paralajmërojnë se lëkura e fëmijëve është më e ndjeshme dhe ekspozimi ndaj kimikateve të panevojshme mund të rrisë rrezikun e irritimeve dhe problemeve të ardhshme.
“Kozmetikoreksia” përkufizohet si një obsesion për të arritur një lëkurë të përsosur, që mund të çojë në përdorim të tepërt ose të papërshtatshëm për moshën të produkteve kozmetike.
“Hetimet u hapën për shkak të shqetësimeve se informacione të rëndësishme, të tilla si paralajmërimet dhe masat paraprake për kozmetikën që nuk është menduar për të mitur ose nuk është testuar tek të miturit, mund të jenë lënë jashtë ose paraqitur në një mënyrë mashtruese”, tha rregullatori.
Megjithëse shitja e këtyre produkteve për të mitur nuk është e ndaluar, autoriteti theksoi: “Përdorimi i shpeshtë dhe i kombinuar i një game të gjerë kozmetike nga të miturit, pa vetëdijen e duhur, mund të jetë i dëmshëm për shëndetin e tyre.”
Nga ana tjetër, LVMH deklaroi se do të bashkëpunonte plotësisht me autoritetet, ndërsa Sephora dhe Benefit nuk dhanë komente shtesë.
“Të gjitha kompanitë riafirmojnë pajtueshmërinë e tyre të rreptë me rregulloret italiane në fuqi”, shtoi kompania.
