Policia italiane ka ndarë detaje nga operacioni kundër një bande të armatosur, me të cilën iu desh të përballej në një luftë të vërtetë, ku mbeti i plagosur edhe një oficer.
Grupi kriminal me 14 persona tashmë është goditur dhe paraburgosur, mes tyre edhe 3 shqiptarë. Organizata po sulmonte një furgon të blinduar në Foggia, dyshohet se transportonte para, por krimi u parandalua në kohë.
Shqiptarët e prangosur janë Emiliano Smakaj, 24 vjeç, Alban Zeneli, 33 vjeç dhe Jurgen Xhixha, po 33 vjeç.
14 burrat nga Foggia, Cerignola dhe Shqipëria që u arrestuan në Vignola, të dyshuar si pjesë e një bande që po përgatiste sulmin ndaj një furgoni të blinduar, janë marrë mëngjesin e sotëm në pyetje, në burgun e Modenës nga gjyqtari hetues i Modenës, Andrea Scarpa. Mes tyre ka edhe emra të njohur për drejtësinë e vendit fqinj dhe publikun në botën e krimit.
Ata janë Luigi Perdonò, 64 vjeç, nga Foggia; vëllai i tij Antonio Perdonò (54); Andrea Baratto (46); Rocco Prudente (53) nga Cerignola; Paolo Schiavulli (29); Giuseppe Bruno (27); Matteo Cannone (29); Antonio Sciusco (23); Antonio Casamassima; dhe Emiliano Smakaj (24), shqiptar banues në Cerignola; Carmine Delli Calici (43) nga San Severo; Carmine Di Benedetto (60) nga Campania, banuese në provincën e Modenës; shqiptarët Alban Zenel (33); Jurgen Xhixha, 33 vjeç.
Prokurori po i kërkon gjyqtarit hetues të vërtetojë arrestimet dhe t’i mbajë ata në burg.
Sipas faqes së internetit të policisë, të dyshuarit po përgatiteshin të “grabisnin një furgon të blinduar”.
“Sulmi u pengua falë ndërhyrjes së oficerëve nga Shërbimi Qendror i Operacioneve dhe Skuadrave Mobile të Chieti dhe Modena, me mbështetjen e oficerëve të NOCS, Skuadrave Mobile të Bolonjës dhe Riminit, dhe një helikopteri. Operacioni kompleks u zhvillua në komunën e Vignola në fshatin e Modenës, ku grupi kriminal kishte vendosur selinë e tij. Gjatë bastisjes, u sekuestruan armë, duke përfshirë katër Kalashnikovë AK-47; tre kova me gozhda të mprehta për të bllokuar kalimin e automjeteve; bidona benzine; një bllokues për të bllokuar komunikimet gjatë sulmit; një kamion për transportimin e pajisjeve; dhe katër makina me fuqi të lartë”, thanë autoritetet.
Sipas raporteve hetimore, objektivi i bandës ishte një automjet i blinduar që i përkiste një kompanie transporti parash që nisej nga Bolonja dhe shkonte në Paderno Dugnano, një qytet me popullsi të dendur në periferi të Milanos. Grabitja me sa duket ishte planifikuar në autostradën A1, Autostrada del Sole (Autostrada e Diellit) që lidh Milanon me Napolin, duke kaluar gjithashtu nëpër Bolonja.
