Ditët e fundit nëpër rrjetet sociale po vlojnë komentet dhe reagimet për mbylljen e Radio Televizionit Shqiptar. Këto reagime kanë ardhur pas deklaratave të bëra pasditen e së premtes nga kryeministri Edi Rama, i cili shfaqi hapur kritikat për mënyrën e menaxhimit të RTSH-së, duke e quajtur një dështim dhe u shpreh se asnjë lekë nuk do shkojë për televizionin deri në reformimin e tij.
E në vazhdën e reagimeve, një kritikë e ashpër për kreun e qeverisë ka ardhur së fundmi edhe nga regjisori Osman Mula, një nga emrat që i ka kushtuar gjithë jetën e tij këtij institucioni.
Përmes një postimi, gjerë e gjatë ai ka akuzuar kryeministrin Edi Rama për kontrollin që ka mbi median dhe përdorim të televizionit publik për interesa personale. Sipas regjisorit mbrapa këtyre deklaratave të kreut të qeverisë, qëndron një tjetër skenar, ndërtimi i kullave, projektet e të cilave prej vitesh kanë qëndruar në zyrën e kryeministrit.
“Ti ke 13 vjet qe je ne pushtet dhe komandon çdo gje qe eshte sot ne Shqiperi. E mban mend kur ne 2014 e shembe televizionin Agon Chanel te italianit sepse e pe si kundershtar. Qe ne start e nise gabim duhet ta respektosh mendimin ndryshe kjo eshte demokracia por ti nuk e pranon se je i dhunshem.
Mban pergjegjesi dhe per RTSH-ne se ti i emeron kuadot drejtuese ne RTSH ne KKRT dhe magjorancen ne keshillin drejtues te RTSH-se .Te gjith sektoret i ke me perfaqesues nga ana jote biles dhe 40 projektet e vitit te fundit u realizuan ne RTSH nga beniamint tuaj sa ne studio aq edhe ne podkast duke thithur buxhetin me pagesa te medha qe e futen institucionin ne kolaps financiar. Mos luaj indiferentin se ti me dashje nuk e sponsorizon radio televizionin se as nuk te pelcet per te. Ti aty do truallin se do tbesh kulla dhe mos i bjer nga Kina qe e ke per zemer por thuaj troc qe do ta shemb pasi ke vite qe edhe projektin e kullave mban te zyra jote”, shkruan regjisori ndër të tjera.
