Wizz Air po rrit pritshmëritë e udhëtimit me buxhet të ulët me prezantimin e WIZZ Class, një shërbim i ri opsional i krijuar për udhëtarët që kërkojnë zgjidhje të leverdishme, por që gjithashtu vlerësojnë hapësirën personale shtesë dhe rehatinë e përmirësuar. Ky shërbim do të jetë i disponueshëm për t`u blerë në disa fluturime të përzgjedhura nga dhe drejt Budapestit, Bukuresht Otopeni, Varshavës, Londër Luton, Londër Gatwick dhe Romë Fiumicino.
Kur një pasagjer zgjedh WIZZ Class, një nga vendet e mesit pranë tyre (1B dhe 1E) do të rezervohet në fluturimet e tyre. Meqenëse rreshti i parë ofron edhe hapësirë shtesë për këmbët, ky shërbim garanton më shumë hapësirë dhe komoditet për t’u relaksuar ose për të punuar gjatë fluturimit, brenda kabinës efikase me një klasë të vetme. Ky produkt do të jetë i disponueshëm si shërbim shtesë gjatë procesit të rezervimit për blerjet me paketat Smart dhe Plus, në faqen e përzgjedhjes së vendit.
Krahas një vendi shtesë për komoditetin e pasagjerit, WIZZ Class do të përfshijë:
Imbarkim me Prioritet me 10 kg bagazh dore
Pije pa alkool dhe snacks
“Udhëtimet e biznesit po rriten në mbarë rrjetin tonë dhe ne kemi dëgjuar atë që kërkojnë pasagjerët tanë,” – u shpreh Silvia Mosquera, Drejtoreshë e Departamentit të Shitjeve dhe Zhvillimit në Wizz Air. “Ata kërkojnë pak më shumë hapësirë dhe shpejtësi, por nuk duan të paguajnë çmimet e larta të linjave tradicionale për klasën biznes. WIZZ Class i përgjigjet pikërisht kësaj kërkese – duke u ofruar pasagjerëve hapësirën që dëshirojnë dhe shërbimin që meritojnë, pa cënuar modelin tonë të thjeshtë dhe të përshtatshëm. Ne mbetemi gjithashtu të përkushtuar të operojmë si një linjë ajrore me një klasë të vetme, në përputhje me objektivat tona të eficencës.”
Ndryshe nga ofertat tradicionale të klasës së biznesit, WIZZ Class nuk kërkon ndërhyrje të kushtueshme në kabinë. Zgjidhja është e thjeshtë: duke mos shitur vetëm dy vendet e mesit, pasagjerëve u krijohet hapësira për t’u shtrirë ose për të punuar, por gjithmonë brenda të njëjtit konfigurim efikas të kabinës për të cilin Wizz Air njihet.
