Spitali i Durrësit ka reaguar pas kritikave në adresë të këtij institucioni të cilat e konsideronin si një ndër shkaqet e vdekjes së 15 vjeçarit E.B (i cili u godit me thilë gjatë një konflikti) në sallën e operacionit.
Sipas spitalit, pretendimet e të afërmve nuk janë të vërteta sepse gjatë operacionit është ndezur gjeneratori.
Ndryshe nga pretendimet e pacientëve të cilët e konsiderojnë spitalin e Durrësit si një institucion të amortizuar, ky instirucion pretendon se ka lidhur kontrata për ta bërë sa më funksional.
Ndërkohë, kujtojmë se pas operacionit, Spitali i Durrësit doli me një postim duke e konsideruar sukses ndërhyrjen fatale, postim i cili nuk gjendet më në këtë faqe.
Deklarata për mediat e spitalit
Spitali Rajonal Durrës
Duke shprehur ngushëllimet më të sinqerta për familjen e të miturit E.B, i cili humbi jetën informojmë opinionin publik se pacienti është paraqitur në gjendje jashtëzakonisht të rëndë, në shok traumatik–hemorragjik.
Ekipet mjekësore kanë ndërhyrë menjëherë me procedura emergjente të specializuara, duke arritur stabilizimin fillestar dhe trajtimin intensiv pasues. Komplikacionet e zhvilluara janë pasojë e gjendjes kritike dhe arrestit kardiak traumatik.
Në vijim të publikimeve mediatike mbi pretendimin se gjatë ndërhyrjes kirurgjikale në Spitalin Rajonal Durrës “kanë ikur dritat”, sqarojmë opinionin publik si më poshtë:
Pas verifikimeve të kryera me ekipet e sallës së operacionit, anestezistët dhe stafin e reanimacionit, nuk është konstatuar asnjë ndërprerje energjie gjatë operacionit të pacientit në fjalë.
Sistemi i gjeneratorit aktivizohet automatikisht dhe pajisjet jetike kanë bateri të brendshme rezervë, që sigurojnë vazhdimësi të plotë edhe në rast të luhatjeve të mundshme.
Gjithashtu, ashensorët e spitalit janë funksionalë dhe të mbuluar me kontratë aktive mirëmbajtjeje, me mekanizma ndërhyrjeje të menjëhershme në rast defektesh.
Spitali Rajonal Durrës është i angazhuar për garantimin e kujdesit shëndetësor dhe bashkëpunon plotësisht me institucionet kompetente për sqarimin e ngjarjes
