El País raportoi se “Brukseli është një qytet plot me spiunë. Rusë, iranianë, izraelitë, kinezë…” Të gjithë lëvizin, duke kërkuar informacion brenda institucioneve evropiane dhe NATO-s, ose për të marrë informacione nga qindra organizata me seli në kryeqytetin belg. Tani, një skandal spiunazhi evropian ka tronditur BE-në dhe qarqet diplomatike në Bruksel.
Komisioni Evropian po heton nëse shërbimet hungareze të inteligjencës kanë punuar për të rekrutuar një rrjet spiunësh midis zyrtarëve evropianë. Dhe, mbi të gjitha, nëse Komisioneri i saj aktual për Shëndetësinë dhe Çështjet e Konsumatorit, hungarez Olivér Várhelyi, ishte në dijeni të aktiviteteve të këtij rrjeti. Hetuesit do të duhet të përcaktojnë nëse ky rrjet përdori agjentë të inteligjencës nën mbulesë diplomatike si punonjës të Përfaqësisë së Përhershme Hungareze në BE kur Várhelyi ishte ambasadori i saj.
Objektivi do të kishte qenë marrja e dokumenteve të klasifikuara dhe informacioneve të ndjeshme me interes për qeverinë e kryeministrit nacionalist-populist Viktor Orbán, i cili është i përfshirë në një mosmarrëveshje të gjatë me BE-në. Akuzat, të zbuluara nga media hungareze investigative Direkt36 në bashkëpunim me mediat belge dhe gjermane, shtrihen nga viti 2012 deri të paktën në vitin 2018.
Qeveria hungareze i ka mohuar të gjitha akuzat, duke i quajtur ato pjesë të një “fushate shpifjeje”. Por fakti mbetet se një ekip i brendshëm sigurie i Komisionit Evropian po heton rastin, të cilin Presidentja e Komisionit të BE-së, Ursula von der Leyen, e ka marrë shumë seriozisht. Shefi i ekzekutivit të BE-së ka thirrur komisionerin hungarez, i cili, për vite me radhë, ka qenë gjithashtu, si një përfaqësues i mirë i Hungarisë, komisioneri më problematik.
Direkt36 dhe partnerët e saj hetimorë tregojnë se si agjenti V., tani një nënkolonel që punonte në Budapest, i cili në vitin 2015 vepronte nën mbulim diplomatik në Bruksel, kontaktoi zyrtarët evropianë hungarezë për t’i rekrutuar ata si informatorë. V., i cili raportonte drejtpërdrejt te Várhelyi, sipas detyrave të tij në misionin diplomatik, i pëlqente të takohej me agjentët e tij të mundshëm në një park të Brukselit.
