Shkodra u trondit nga tjetër atentat mafioz mbrëmjen e djeshme. Kristian Kola, teksa qëndronte jashtë ambienteve të një lokali te “Kinema Republika”, u qëllua me breshëri plumbash nga dy persona me motor.
Si pasojë e plagëve të marra 34-vjeçari humbi jetën në vend. Ngjarja e rëndë ndodhi rreth orës 22:30, ku dy autorët me motor dhe skafandra në kokë iu afruan Kolës, i cili ishte duke pirë kafe në ambientet e jashtme të lokalit dhe hapën zjarr ndaj tij.
Pasi e qëlluan disa herë, dy autorët u larguan nga vendi i ngjarjes me shpejtësi “skëterrë”, ndërkohë që trupi i Kristianit i bërë “shoshë” nga plumbat mbeti në bulevard.
Ndërkaq nga informacionet e siguruara nga Policia e kryeqendrës së veriut, Kola nuk rezulton një person me precedentë të mëparshëm kriminal.
Ky fakt është konfirmuar edhe nga gazetari Arben Çokaj i cili njihte nga afër 34-vjeçarin. Me anë të një postimi në rrjetin e tij social “Facebook”, Çokaj shkruan se Kristiani ishte një djalë i mirë dhe se nuk merrej me punë të dyshimta.
Sipas gazetarit, ai së bashku me të atin kishin një firmë ndërtimi dhe se përgjatë këtyre ditëve ishin duke shtruar me pllaka përreth Kinemasë Milenium, aty ku dhe ndodhi ngjarja e rëndë.
Madje, jo më larg se një ditë para se të ndodhte atentati, Çokaj ishte takuar me 34-vjeçarin ku ky i fundit i kishte treguar dhe dëshirën e tij për të blerë një makinë.
“Sonte, një motor me 2 njerëz kalojnë te Hotel Golden Palacë, ku po rrinte aty jashtë Kristian Kola, 34 vjeç dhe e vrasin në vend, rreth orës 22:30…
Sa e lirë dhe e pavlerë është jeta këtu në Shkodër e në Shqipëri. A do reagoni o njerëz një ditë, para se të shuheni? Si vritet tjetri kot së koti ashtu?!
Kristianin ka kohë që e njoh, djalë shumë i mirë, nuk e di se është marrë me punë të dyshimta, me të atin kishin një firmë ndërtimi, dhe këto ditë ishin duke shtruar pllakat përreth Kinemasë Milenium në Shkodër, aty përballë ku i ndodhi edhe kjo ngjarje kaq e tmerrshme. Dje në drekë Kristiani më tha se jam ba me ble një makinë të re dhe ashtu bëmë humor pak.
Uroj që vrasësit e ata që qëndrojnë pas këtij krimi makabër të gjenden sa më shpejt nga policia! Kanë luajtë mendsh njerëzit, merruni more vesh, pse vriteni kështu, o tupa! Vëreni trurin në punë se nuk është turp”, shkruan ai
