Kid Kazazi, u arrestua nga policia në Tiranë, pas 3 muajve në arrati. Ai kërkohej për vrasje të mbetur në tentativë. Në pranga përfundoi edhe shoku, i cili e kishte ndihmuar të fshihej.
Kid Kazazi 30 vjeç banues në Kavajë udhëtonte me makinë kur punonjësit e policisë e pikasën në zonën e “Komunës së Parisit” në Tiranë dhe i kërkuan kartën e identitetit. Ai u paraqiti dy dokumente identifikimi, kartë ID dhe leje drejtimi me të dhënat e një personi tjetër, të cilat sipas policisë, dyshohet se janë të falsifikuara.
Kid Kazazi është ndjekur dhe vëzhguar për 3 ditë me radhë nga agjentët e Komisariatit nr. 2, pasi fillimisht u ndalua me ID dhe patentë italiane me emrin Keyan Rama. Policia e Tiranës kërkoi më shumë informacion dhe zbuloi se në fakt, ai ishte i kërkuar për vrasje të mbetur në tentativë 3 muaj më parë, dhe e arrestoi.
Ky operacion çoi në pranga edhe një 31-vjeçar, Ferhat Kaja, i cili rezulton i shpallur në kërkim për dhunën ndaj pronarit të lokal “Tokyo” Laert Kasaj. Kaja po udhëtonte në makinë me Kid Kazazin, të cilin dyshohet se e përkrahur dhe ndihmuar të fshihej.
Gjatë kontrollit fizik 31-vjeçarit iu gjetën një sasi municioni luftarak, të cilat u sekuestruan bashkë me automjetin e të kërkuarit.
Ndaj Kid Kazazit, Gjykata e Durrësit kishte caktuar në mungesë masë arresti në burg për veprën penale vrasje në rrethana cilësuese, mbetur në tentativë dhe armëmbajtje pa leje.
Episodi është shënuar më 30 maj të këtij viti, në Fllakë të Durrësit, kur i riu qëlloi me armë zjarri drejt një automjeti ku udhëtonte një 36-vjeçar dhe 2 të mitur. Nga ngjarja mbeti i plagosur Arbër Goreja i cili u qëllua nga një tjetër automjet në lëvizje. Fatmirësisht të miturit nuk u lënduan. Dyshohet se Kid Kazazi tentoi ta vrasë Arbër Gorenë pasi më herët i kishte goditur me grusht në fytyrë babanë e moshuar, episod që 30-vjeçari nuk ia kishte falur.
