Mjekja infeksioniste pranë QSUNT-së, Esmeralda Meta tha për mefiat se kjo virozë karakterizohet nga dhimbjet e stomakut, të përzierat, të vjella, fenomene diarreje të shpeshta dhe episode temperature febrile që shkon deri në 38 gradë.
“Këto viroza kanë një kohëzgjatje nga 24-72 orë dhe prekin të gjitha grupmoshat nga fëmijët, të rriturit dhe grupmoshën e tretë. Dy grupe më të ndjeshme janë fëmijët dhe të moshuarit, sidomos personat me sëmundje kronike, ata me patologji imunitare të ulët, si kimioterapi apo neoplazike që janë edhe më të ekspozuar për t’u prekur nga kjo virozë”, tha Meta.
Sipas mjekes Meta, gjatë dy javëve të fundit të muajit gusht është vënë re një rritje e numrit të pacientëve që paraqiten në urgjencën e shërbimit infektiv pranë QSUNT-së me diagnozën e virozës së stomakut.
“Numri i rasteve në 24 orë mund të kalojë edhe 100 persona, e sidomos në fundjavë mund të arrijë edhe në 140 apo 150 raste në ditë. 70-80% e tyre janë në format e gastroenteriteve febrile që marrin shërbimin e urgjencës, por jo me komplikacione madhore apo shtrime në spital”, u shpreh mjekja infeksioniste.
Meta pohoi për ATSH-në se “virozat e stomakut janë gastroenterite virale, karakteristikë e periudhës së pranverës, por që shfaqen edhe në periudha të tjera të vitit. Simptomat karakterizohen nga dhimbjet e stomakut, të përziera, të vjella, episode diarreike, lodhje, dhimbje muskulare, dhimbje koke, humbje oreksi etj”.
Sipas mjekes, disa nga këshillat e vlefshme për ta kaluar virozën e stomakut në kushte shtëpie janë si fillim një regjim i mirë pushimi në shtëpi, përdorimi i mjekimeve kundër dhimbjeve, të vjellave, antidiarrikët me konsultën e mjekut.
“Përdorim i lëngjeve me porcione të pakta, deri në qetësimin e krizave e më pas shmangia e ushqimeve të forta, të rënda në yndyra apo proteina, si mishi, veza etj. Konsum i ushqimeve të lehta, siç janë supat, kosi, dhe kthimi gradual mbas lehtësimit të simptomave në ushqyerjen normale”, cilësoi Meta.
Mjekja këshillon shmangien e qëndrimeve në temperatura të larta, eliminim i pijeve të gazuara dhe atyre alkoolike.
Mjekja Meta tha se këto lloj virozësh transmetohen nëpërmjet kontakteve të drejtpërdrejta, spërklave, gjatë vjellave ose përmes diarresë, sipërfaqeve objekteve të kontaminuara me këtë lloj virusi. Ndaj sipas saj, risku i transmetimit brenda personave të familjes apo që ndajnë ambiente të përbashkëta është i lartë.
“Rekomandohet që larja e duarve të jetë e shpeshtë pas kontaktit me gojën dhe jo vetëm me ujë, por edhe me antiseptikë. Pastrimi i objekteve, sipërfaqeve në kuzhinë, i tualeteve në shtëpi ose në ambientet e përbashkëta në kopshte, shkolla, kampe verore. Dezinfektimi me ujë të nxehtë, me solucione i gotave dhe pjatave është një tjetër sugjerim që ne si mjekë e bëjmë shpesh në rastin e virozës së stomakut”, përfundon Meta
