Presidenti i SHBA-së, Donald Trump, bëri sot thirrje që miliarderi George Soros dhe djali i tij të përballen me akuza penale.
“George Soros dhe djali i tij i jashtëzakonshëm i ekstremit të majtë duhet të akuzohen sipas Aktit RICO për mbështetjen e tyre për protesta të dhunshme dhe shumë më tepër në të gjithë SHBA-të. Ne nuk do t’i lejojmë më këta lunatikë ta shkatërrojnë Amerikën, duke mos i dhënë kurrë as edhe një shans për të ‘MARRË FRYMË’ dhe për të qenë e LIRË”, tha Trump.
“Sorosi dhe grupi i tij i psikopatëve i kanë shkaktuar dëme të mëdha vendit tonë! Kjo përfshin edhe miqtë e tij të çmendur nga Bregu Perëndimor (SHBA). Kini kujdes, po ju vëzhgojmë!” shtoi ai.
Në apelin e tij shefi i Shtëpisë së Bardhë i referohet ligjit që lejon ndjekjen penale të organizatave kriminale. Në vitin 2023 George Soros ia dha kontrollin e Fondacioneve të tij të Shoqërisë së Hapur me vlerë shumëmiliardë dollarë Alex Sorosit. Mbetet e paqartë se kush janë miqtë të cilëve u referohet Trump.
RICO, është një nga mjetet më të fuqishme të qeverisë për të goditur krimin e organizuar. Ai ishte qendror në përpjekjet për të shkatërruar mafian amerikane duke u lejuar prokurorëve të lidhnin së bashku krime në dukje të palidhura që po kryheshin si pjesë e një sipërmarrjeje kriminale
