Qeveria portugeze do të zhvillojë konsultime me presidentin dhe parlamentin e vendit mbi mundësinë e njohjes së shtetit të Palestinës në OKB në shtator, njoftoi zyra e kryeministrit Luis Montenegro.
“Portugalia po shqyrton njohjen e shtetit palestinez, brenda kuadrit të një procesi që mund të përfundojë në javën e Asamblesë së 80-të të Përgjithshme të Kombeve të Bashkuara, e cila do të mbahet në Nju Jork në shtator”, thuhet në deklaratën e qeverisë.
Vendimi për të mbajtur konsultime vjen pas kontakteve të shumta midis qeverisë dhe partnerëve të saj, kryesisht duke marrë parasysh “zhvillimin jashtëzakonisht shqetësues të konfliktit, si në nivel humanitar ashtu edhe raportet e përsëritura për një aneksim të mundshëm të territoreve palestineze” nga Izraeli.
Vende të tjera si Franca, Britania dhe Kanadaja kanë njoftuar tashmë qëllimin e tyre për të njohur një shtet palestinez në shtator.
Iniciativat vijnë pasi një grup ndërkombëtar i monitorimit të urisë i mbështetur nga OKB-ja konfirmoi të martën se një skenari më i keq i urisë ishte në zhvillim e sipër në Gaza.
“Qeveria ka kryer një proces shumë të kujdesshëm dhe të menduar mirë, gjithmonë pas diskutimeve me partnerët e saj evropianë dhe partnerë të tjerë”, tha Presidenti portugez Marcelo Rebelo de Sousa menjëherë pas njoftimit të qeverisë portugeze.
