Presioni nga krimi i organizuar, media dhe politika cilësohet nga SPAK si problematika kryesore që ka cenuar rëndë punën e tyre gjatë vitit 2024.
Në raportin vjetor që Prokuroria e Posaçme dorëzoi në Kuvend, pranon se ndërhyrjet nga faktorët e jashtëm kanë rrezikuar të cenojnë po ashtu edhe integritetin e prokurorëve të SPAK, si dhe çështjet hetimore të ndjekura prej tyre.
“Presioni i jashtëm ndaj SPAK nga krimi i organizuar, aktorë politikë dhe mediatikë, i cili cenon pavarësinë e tij kushtetuese dhe efektivitetin në hetime. Ndërhyrjet e jashtme rrezikojnë gjithashtu, integritetin e prokurorëve dhe të procesit hetimor. Për të garantuar pavarësinë e SPAK-ut, si dhe mbështetje për prokurorët në çështje të ndjeshme, nevojitet një reagim më i koordinuar dhe në kohë i të gjitha institucioneve, të cilat kanë përgjegjësinë e mbrojtjes së integritetit të SPAK”, thotë Prokuroria e Posaçme.
Në raportin prej 109 faqesh, SPAK rendit gjithsej 10 problematika të hasura gjatë vitit të kaluar. Sipas tyre, ende vijon të ngelet problematike numri i ulët i referimeve nga institucionet publike, përfshirë policinë e shtetit në lidhje me veprat penale në kuadër të korrupsionit dhe krimit të organizuar. Problematikë, thotë SPAK, është hasur që nga viti 2023 me mos ekstradimin e shtetasve shqiptarë të arrestuar në Emiratet e Bashkuara Arabe.
Si sukses të punës së prokurorëve të SPAK të bërë vitin e kaluar, në raport përmendet goditja ndaj krimit të organizuar dhe arrestimi i zyrtarëve të lartë të pëerfshirë në vepra korruptive.
Nga janari deri në dhjetor të 2024-ës, SPAK ka regjistruar 328 procedime dhe 629 persona janë vënë nën hetim.
SPAK evidenton krahasuar me vitin 2023, numri i përgjimeve ka qenë më i ulët në vitin 2024, ku janë përgjuar 3096 numra telefonike në përdorim. Gjatë vitit 2024, rezultojnë që 33 ish-zyrtarë të lartë janë vënë nën hetim dhe për 19 prej tyre çështjet janë dërguar për gjykim.
Ndër të tjera në raport cilësohet edhe ekzistenca e 16 grupeve kriminale e me rrezikshmëri të lartë shoqërore që veprojnë në vendin tonë, e që operojnë kryesisht në trafikun e kokainës në disa vende të BE-së. SPAK thotë se është provuar veprimaria kriminale për 10 grupe që kanë operuar në vend dhe që kanë përdorur metoda të sofistikuara, përfshirë komunikimet e koduara si SKY ECC dhe pastrimin e parave përmes kriptovalutave. Ato kanë depërtuar në struktura të rëndësishme të shoqërisë, duke përfshirë gjyqësorin, prokurorinë, policinë, median dhe akademinë.
“Këto grupe janë të strukturuara mbi baza familjare dhe miqësore dhe veprojnë në qarqet e Tiranës, Durrësit, Shkodrës, Kukësit, Lezhës, Elbasanit dhe Vlorës”, citohet në raportin e SPAK.
Në punën e prokurorëve të SPAK përmenden sekuestrimet dhe konfiskimet e pasurisë të bëra vitin e shkuar. Vlera e aseteve të sekuestruara përllogaritet afërsisht prej 65,5 milion euro, një shifër rekord për SPAK. Ndërsa vlera e pasurive të konfiskuara përllogaritet në rreth 938 milion lekë.
Sipas SPAK, rezulton se 30 milionë euro të pasurive të konfiskuara dhe sekuestruara u përkasin zyrtarëve të lartë.
