500 milionë lekë do të jetë fondi i posaçëm që do të miratohet nga Kuvendi i Shqipërisë për të ndihmuar komisionin e drejtuar nga politikani socialist Fatmir Xhafaj, për hartimin e legjislacionit të reformave të bashkëqeverisjes dhe antikorrupsionit.
Report TV ka nxjerr listën me emrat e ekspertëve që do të marrin deri në 8 milionë lekë në muaj, të ndarë në tre nivele të ndryshme. Sekretariati teknik i përbërë nga 15 vetë, dhe 12 ekspertë të nivelit të tretë do të marrin për punën pranë këtij komisioni, 2.800 euro.
Kryetari socialist i Komisionit, Fatmir Xhafaj ka parashikuar pagesë edhe për një kategori të quajtur “ekspertë të huaj”. Ata janë 23 persona dhe do të paguhen 5.600 euro.
Siç duket nga specifikimi i emrave, ekspertët e huaj rezultojnë të jenë shqiptarë me banim jashtë vendit. Përfshirja e ekspertëve nga diaspora ka qenë një prej angazhimeve që ka marrë Fatmir Xhafaj në publik për hartimin e legjislacionit të posaçëm.
Ky komision do të ketë një mandat 10 mujor dhe do të përbëhet nga 6 deputetë socialistë, si dhe 5 anëtarë nga kahu i Partisë Demokratike. Ai drejtohet nga Fatmir Xhafaj me anëtarët socialistë Klotida Bushka, Eduard Shalsi, Etilda Gjonaj, Evis Kushi dhe Toni Gogu.
Komisioni i Posaçëm Parlamentar Anti-korrupsion i pagëzuar ndryshe si “Reforma në Drejtësi 2” është propozuar nga Partia Socialiste nën kundërshtimin e fortë të demokratëve, me qëllimin për të thelluar reformat shtet-formuese dhe luftën me korrupsionin.
