Kreu i PD-Demokratët Euroatlantikë, Lulzim Basha, për televizionin MCN u shpreh se ish-kryeministri Sali Berisha dhe kreu i PL, Ilir Meta, kanë dalë në krye të opozitës për t’u mbrojtur nga drejtësia, dhe nuk janë të izoluar nga SPAK-u.
Basha shtoi se ata që mbështesin Berishën dhe Metën shpresojnë të përfitojnë nga situata e tyre në raport me drejtësinë dhe faktorët ndërkombëtarë, duke theksuar se shqiptarët nuk mund të mashtrohen nga këto veprime.
Ai gjithashtu nënvizoi se është një pjesë e opozitës që është marrë peng nga individë me probleme me drejtësinë.
Pjesë nga intervista:
Pyetje: Mendoni se SPAK po dëmton opozitën, të gjithë opozitarët thonë duke lënë të izolur edhe zotin Berisha por edhe zotin Meta.
Lulzim Basha: Zoti Berisha dhe zoti Meta kanë vetëdalë në krye të segmentëve të opozitës për t’u mbrojtur nga drejtësia dhe jo anasjelltas. Dhe ata që i shkojnë mbrapa zotit Berisha dhe zotit Meta shpresojnë të përfitojnë nga situatat e tyre në raport me drejtësinë dhe në raport me faktorin ndërkombëtar. Shqiptarët nuk e hanë ‘sapunin për djath’. Nuk është SPAK-u që ka izoluar krerët e opozitës. Është një pjesë e opozitës që është marrë peng nga njerëz me problem me drejtësinë.
