Nga Isa Myzyraj
Negociatat mes opozitës së Rithemelimit dhe Partisë Socialiste për rikthimin në normalitet të parlamentit vlerësohen si pozitive nga analistët. Por ata ndahen tek ajo se çfarë fitoi opozita pas 5 muajsh aksion opozitar. Për Mentor Kikinë opozita fitoi rikthimin në jetën politike, ndërsa për Lavdrim Litën nuk ka fituar gjë!
Parlamenti pritet t’i rikthehet normalitetit pas muajsh kaos. Demokratët dhe socialistët janë duke negociuar detajet që rikthejnë qetësinë në Kuvend, ndërsa për analistët ky bashkëpunim është në të mirë të Shqipërisë!
Mentor Kikia: “Unë besoj që në të tilla raste aritmetika se çfarë fitoi dhe çfarë humbi, nuk është kaq e thjeshtë. Së pari, mendoj, se me normalizimin e jetës politike në vend, fiton shoqëria, mjedisi politik, fiton demokracia në tërësi”.
Lavdrim Lita: “Normalizimi i jetës parlamentare është një plus për Shqipërinë”.
Por për Lavdrim Litën opozita nuk ka fituar asgjë nga kërkesat e saj!
Lavdrim Lita: “Opozita nuk është se ka fituar ndonjë gjë të madhe. Dy komisionet parlamentare do të bëhen me ligjin që ka miratuar dhunshëm Partia Socialiste, po ashtu edhe me Rregulloren e Kuvendit, e cila po ashtu është miratuar dhunshëm nga PS-ja”.
Për Mentor Kikinë opozita e rithemelimit ka fituar diçka më të rëndësishme sesa kërkesat e saj.
Mentor Kikia: “Opozita fitoi rikthimin në formacionin politik, i konsideruar edhe nga ndërkombëtarët”.
Lita thekson nevojën për transparencë të negociatave mes palëve.
Lavdrim Lita: “Është mirë që për interesin publik këto marrëveshje të bëhen transparente dhe publike, sidomos në institucione, në komisionin e reformës zgjedhore, apo në Parlament”.
Analisti Mentor Kikia tha se tanimë topi është në fushën e opozitës për të analizuar me mendje të ftohtë atë që ka ndodhur dhe të përgatisë projektin politik!
