Autoritetet kineze kanë njoftuar se do të zbulojnë një “sistem sekret global të inteligjencës” që ata pretendojnë se operohet nga qeveria amerikane. Megjithatë, Pekini nuk ka thënë se kur do të ndodhë, as se çfarë saktësisht i referohet ai sistem zbulimi.
E gjithë historia fillon në fund të korrikut, kur autoritetet kineze njoftuan se një qendër e monitorimit të tërmeteve në Wuhan ishte hakuar nga një grup kibernetik që ata thanë se qëndronte pas qeverisë amerikane. Ministria e Jashtme e Kinës dënoi sulmin e papërgjegjshëm dhe tha se “do të bënte gjithçka që mundet për të mbrojtur sigurinë e saj kibernetike”.
Gazeta kineze “Global Times” njoftoi dje se “është bërë përparim i ri në hetimin e sulmeve kibernetike”, dhe se një ekip i përbashkët hetimor ka zbuluar “softuer me qëllim të keq që tregon karakteristikat e agjencive të inteligjencës amerikane”.
Qendra e Monitorimit të Tërmeteve është, kur bëhet fjalë për të dhënat, një institucion shumë më i rëndësishëm sesa mund të duket në pamje të parë.
Ekspertët kinezë deklarojnë se të dhënat e monitorimit të tërmeteve përfshijnë jo vetëm informacionin bazë si madhësitë dhe epiqendrat, por edhe të dhëna gjeografike dhe gjeologjike si deformimi i sipërfaqes apo monitorimi hidrologjik. Kjo ka një vlerë të madhe kur bëhet fjalë për inteligjencën ushtarake.
Xiao Singuang i kompanisë antivirus “Anti Labs” shpjegoi se të dhënat e dridhjeve dhe valëve të zërit të mbledhura nga sensorët kinezë kanë vlerë të konsiderueshme inteligjence për vlerësimin e terrenit gjeologjik, analizën e testeve të sistemit të armëve dhe testet bërthamore.
Ekspertët besojnë gjithashtu se sulmet kibernetike në infrastrukturën civile, duke përfshirë sistemet e monitorimit të tërmeteve, mund të çojnë në pasoja të rënda.
