Nga Sebastian Zonja
Presidenti amerikan Xho Baiden tha të premten se një marrëveshje normalizimi marrëdhëniesh mes Arabisë Saudite dhe Izraelit është në horizont dhe është në rrugë të mbarë. Deri më tani, sipas medieve amerikane, sauditët kanë qenë në qendër të vëmendjes dhe kërkesat e tyre janë të mëdha. Për t’u shkëputur nga ndikimi rus dhe kinez, analistët amerikanë shkruajnë se sauditët kanë kërkuar partneritet me SHBA-të ngjashëm me të NATO-s (sulmi ndaj saj do të cilësohej sulm ndaj NATO-s), si dhe zhvillimin e një programi bërthamor civil.
Gazetari Tomas Fridman shkroi se sauditët kanë kërkuar gjithashtu lëshime të rëndësishme për Palestinën, ëka do të mund të rrëzonte qeverinë Netanjahu nëse amerikanët do të shtonin presionin për arritjen e marrëveshjes.
Këshilltari i Sigurisë Kombëtare të Shtëpisë së Bardhë, Xheik Salivan, një nga ndihmësit më të besuar të Baidenit, ishte në Xhedah këtë javë, bashkë me emisarin për Lindjen e Mesme Bret MekGërk.
Për “Foks Njuz”, kryeministri Netanjahu tha se një marrëveshje izraelito-saudite “mund të jetë shumë afër nëse sauditët e duan atë. Varet nga ata”, tha ai. Marrëveshja izraelito-saudite do t’i japë fund konfliktit arabo-izraelit dhe do të mundësojë t’i japim fund konfliktit palestinezo-izraelit, tha Netanyahu. Sipas tij, Izraeli duhet së pari të bëjë paqe me botën arabe dhe vetëm më pas me palestinezët.
Por Izraelit mund t’i duhet të paguajë një çmim të lartë për një marrëveshje të tillë dhe pyetja është sa i gatshëm është Tel Avivi për të kapur ëastin.
Më herët, administrata e ish-presidentit Donald Tramp arriti marrëveshje të ngjashme midis Izraelit dhe Marokut, Sudanit, Bahreinit dhe Emirateve të Bashkuara Arabe nën të ashtuquajturit Paktet e Abrahamit.
