Një valë e të nxehtit po përfshin pjesë të Evropës jugore dhe Afrikës veriperëndimore, me temperatura të mundshme rekord në ditët në vijim.
Temperaturat pritet të kalojnë 40C në pjesë të Spanjës, Francës, Greqisë, Kroacisë dhe Turqisë. Në Itali, temperaturat mund të arrijnë deri në 48.8C, ndërsa një paralajmërim alarmi i kuq është lëshuar për 10 qytete, përfshirë Firencen dhe Romën.
“Ne po përballemi me një valë të padurueshme të nxehti. Ndoshta është rasti që në orët më të nxehta merren të gjitha masat e dobishme për të shmangur tragjeditë”, shkroi në Twitter politikani italian Nicola Fratoianni.
Vala e të nxehtit Cerberus, e quajtur nga Shoqëria Meteorologjike Italiane sipas përbindëshit me tre koka që shfaqet në ferrin e Dantes, pritet të sjellë kushte ekstreme në ditët në vijim.
Temperaturat do të arrijnë kulmin të premten ku zona të mëdha të Evropës Jugore mund të shohin temperatura edhe nga mbi 40 gradë.
Temperatura më e lartë ndonjëherë në Evropë prej 48,8 gradë Celsius u regjistrua pranë Sirakuzës në ishullin italian të Siçilisë në gusht 2021.
Më shumë se 60,000 njerëz vdiqën në Evropë si pasojë e të nxehtit vitin e kaluar. Frika është se kjo valë e të nxehtit mund të shkaktojë shumë më shumë vdekje këtë verë.
Vala e të nxehtit është një periudhë e motit të nxehtë ku temperaturat janë më të larta se sa priten për periudhën e vitit.
Ekspertët thonë se periudhat e motit jashtëzakonisht të nxehtë po bëhen më të shpeshta dhe ndryshimi i klimës do të thotë se tani është normale të përjetohen temperatura rekord.
Qendra Evropiane për Parashikimet e Motit me Distanca të Mesme tha se në nivel global, qershori i këtij viti ishte më i nxehti i regjistruar./ BBC
