Gjeneralët më të lartë në hiearkinë e ushtrisë ruse janë zhdukur nga sytë e publikut pas kryengritjes së dështuar të Vagnerit që synonte rrëzimin e Putinit.
Valery Gerasimov, gjenerali më i lartë rus nuk është shfaqur në publik dhe në televizionin shtetëror që nga kryengritja e dështuar e së shtunës e grupit Vagner, kur shefi i mercenarëve Yevgeny Prigozhin kërkoi dorëzimin e gjeneralit Gerasimov.
Që prej 9 qershorit ai nuk përmendet as në deklaratat për shtyp të Ministrisë së Mbrojtjes. Gerasimov, 67 vjeç, është komandanti i luftës së Rusisë në Ukrainë dhe mbajtësi i njërës prej tre “çantave bërthamore” të Rusisë.
Përveç tij nga opinioni publik është zhdukur edhe gjenerali Sergei Surovikin, i mbiquajtur nga media ruse si “Gjenerali Armagedon” për taktikat e tij agresive në konfliktin sirian, i cili është zëvendëskomandant i forcave ruse në Ukrainë.
Megjithatë, nga ana tjetër, Moska ka kundërshtuar lajmet e New York Times se një prej gjeneralëve rusë dyshohet se ka pasur informacion paraprak për planet e shefit të Vagnerit, Yevgeny Prigozhin për t’u ngritur kundër Putinit. Moska i ka cilësuar raportimet e prestigjiozes amerikane si “spekulime dhe thashetheme” .
Versioni në gjuhën ruse i Moscow Times dhe një bloger ushtarak raportuan arrestimin e Surovikin, ndërsa disa korrespondentë të tjerë ushtarakë në Rusi thanë se ai dhe oficerë të tjerë të lartë po merreshin në pyetje për rolin e tyre të mundshëm në kryengritjen e Vagnerit.
Rybar, një kanal me ndikim në aplikacionin e mesazheve Telegram i drejtuar nga një ish-oficer i Ministrisë ruse të Mbrojtjes ka deklaruar se spastrimi po vijon.
Ai ka shkruar se autoritetet po përpiqeshin të largonin personelin ushtarak që mendohej se kishte treguar “mungesë vendosmërie në shuarjen e kryengritjes” duke iu referuar informacioneve se “pjesë të forcave të armatosura s’kanë bërë sa duhet për të ndaluar luftëtarët e Vagnerit”
“Kryengritja e armatosur nga kompania ushtarake private Vagner është bërë pretekst për një spastrim masiv në radhët e Forcave të Armatosura Ruse”, shkruan Rybar.
Një veprim i tillë, nëse konfirmohet, mund të ndryshojë mënyrën se si Rusia zhvillon luftën e saj në Ukrainë – të cilën ajo e quan një “operacion special ushtarak” – dhe të shkaktojë trazira në një kohë kur Moska po përpiqet të pengojë kundërofensivën ukrainase.
Ajo gjithashtu mund të çimentojë ose të lartësojë pozitat e figurave të tjera të larta ushtarake dhe të sigurisë që konsiderohen si besnikë. Disa analistë ushtarakë dhe politikë rusë dhe perëndimorë besojnë se ministri i Mbrojtjes Sergei Shoigu, një aleat i vjetër i Putinit, të cilin Prigozhin donte ta rrëzonte me Gerasimov tani mund të jetë më i sigurt në punën e tij.
“Unë mendoj se ai (Prigozhin) në të vërtetë priste që do të bënte diçka në lidhje me Shoigu dhe Gerasimovin, që Putini të sundonte në favor të tij. Në vend të kësaj, rebelimi i tij mund të ketë siguruar vazhdimësinë e qëndrimit të tyre, pavarësisht se është njohur botërisht si i paaftë dhe i urryer gjerësisht në forcat e armatosura të Federatës Ruse”, shkroi në Tëitter Michael Kofman, specialist ushtarak rus në institutin “Carnegie Endowment”.
Viktor Zolotov, kreu i Gardës Kombëtare që dikur ishte truproja e Putinit, duket të jetë një tjetër përfitues pasi u shfaq në publik duke thënë se njerëzit e tij ishin gati të “qëndronin deri në vdekje” për të mbrojtur Moskën nga Vagneri.
Ai ka folur për mundësinë e marrjes së armatimit të rëndë dhe tankeve për forcat e tij në vazhdën e rebelimit.
Mungesa e Gerasimovit u evidentua nga të gjithë, kur Vladimir Putin falënderoi ushtrinë për shmangien e një lufte civile. Ndryshe nga Shoigu i cili ka dalë disa herë në publik që atëherë, zëvendësi i Gerasimovit, Surovikini u pa për herë të fundit të shtunën kur ai u shfaq në një video duke i bërë thirrje Prigozhinit që të ndalonte kryengritjen e tij.
Surovikini dukej i rraskapitur dhe ishte e paqartë nëse po fliste nën presion.
Ndërkaq ka pasur raporte të pakonfirmuara të mediave ruse dhe blogerëve të mërkurën në mbrëmje se Surovikin po mbahej në objektin e paraburgimit Lefortovo të Moskës pasi u arrestua.
Gazetari Alexei Venediktov, bëri të ditur se Surovikini nuk kishte qenë në kontakt me familjen e tij që nga e shtuna dhe as truprojat e tij nuk kanë folur.
Prigozhin, i cili kishte shpenzuar muaj të tërë duke fyer Shoigun dhe Gerasimovin duke e akuzuar për paaftësi në luftën e Ukrainës, kishte lavdëruar shpesh Surovikinin, i cili shihet me shumë respect në ushtri nisur nga përvojën e tij në Çeçeni dhe Siri, transmeton Reuters.
Surovikin, i cili ishte komandant i përgjithshëm i luftës në Ukrainë përpara se Gerasimovi të emërohej për të marrë drejtimin, konsiderohet nga analistët ushtarakë perëndimorë dhe nga një pjesë e ushtrisë ukrainase si mjaft efektiv. Ai shihej nga korrespondentët rusë të luftës si një nga emrat e mundshm për ministër Mbrojtjes së Rusisë në të ardhmen.
