Në një njoftim të Zyrës së Shtypit të Vatikanit, ekipi mjekësor përditëson rreth gjendjes shëndetësore të Françeskut pas operacionit të djeshëm, më 7 qershor, të laparotomisë dhe kirurgjisë plastike të murit të barkut me protezë. Papa është “në gjendje të mirë të përgjithshme” dhe ka e kaluar “qetë” natën e parë. Ndërkohë, mesazhet e afërsisë dhe urimet për shërimin e shpejtë vazhdojnë të mbërrijnë në Vatikan: Papa, i informuar, falënderon dhe kërkon të vazhdojmë të lutemi për të.
R.SH. – Vatikan
“Stafi mjekësor që ndjek kursin postoperativ të Papës informon se Papa Françesku ka kaluar një natë të qetë duke arritur të pushojë për një kohë të gjatë; është në gjendje të mirë të përgjithshme, vigjilent dhe merr frymë në mënyrë spontane.
Analizat rutinë vijuese janë të mira. Gjatë gjithë ditës Papa do të respektojë pushimin e nevojshëm pas operacionit”. Kështu njoftoi sot zyra e shtypit e Selisë së Shenjtë pas ndërhyrjes së laparotomisë dhe operacionit plastik të murit të barkut, me protezë që Ati i Shenjtë iu nënshtrua dje në Poliklinikën Gemelli, në Romë
“Papa është informuar dhe informohet vazhdimisht për mesazhet e afërsisë dhe dashurisë që kanë mbërritur që dje e deri në orët e fundit dhe shpreh mirënjohjen e tij, duke kërkuar njëkohësisht që të vazhdojmë të lutemi për të”, përfundon njoftimi i zyrës së shtypit të Vatikanit.
